സാധാരണ ഉപഭോക്താക്കളെ പോലെ കടകളിലെത്തി സാധനം വാങ്ങുകയായിരുന്നു ഏതാനും യുവാക്കള്‍. സാധനങ്ങള്‍ പരതി വേണ്ടത് തീരുമാനിച്ച ശേഷം ബില്ല് ചെയ്തു പണം കൊടുക്കാൻ ക്യാഷ് കൗണ്ടറിലെത്തിയപ്പോള്‍ യുപിഐ പേയ്മെന്റ് ആണെന്നാണ് ക്യാഷ്യറോട് പറഞ്ഞത്.
ക്യു.ആർ കോഡ് കാണിച്ചുകൊടുത്തു. അത് സ്കാൻ ചെയ്തു. പണം കിട്ടിയതായുള്ള അറിയിപ്പും കടയിലെ ജീവനക്കാർക്ക് കിട്ടി. പിന്നാലെ സാധനങ്ങള്‍ കൊടുത്തുവിടുകയും ചെയ്തു.
എന്നാല്‍ വൻ തട്ടിപ്പാണ് നടന്നതെന്ന് മനസിലായത് ദിവസങ്ങള്‍ക്ക് ശേഷം മാത്രമായിരുന്നു. അന്വേഷിച്ചപ്പോള്‍ ഒരേ ഗൃഹോപകരണ വില്‍പന ശൃംഖലയുടെ പല ശാഖകളില്‍ നിന്ന് ഇതേ സംഘം സാധനങ്ങള്‍ വാങ്ങിയെന്ന് മനസിലായി. ഏകദേശം നാല് കോടിയോളം രൂപയുടെ സാധനങ്ങള്‍ ഇങ്ങനെ വാങ്ങിക്കൂട്ടിയത്രെ.
തട്ടിപ്പ് നടത്തിയ ശേഷം ഇവയെല്ലാം മറ്റുള്ളവർക്ക് വിറ്റ് പണം വാങ്ങുകയായിരുന്നു രീതി. ഹൈദരാബാദിലാണ് ഇതുവരെ കേട്ടിട്ടില്ലാത്ത ഇത്തരമൊരു തട്ടിപ്പ് വൻതോതില്‍ അരങ്ങേറിയത്. സൈബറാബാദ്, ഹൈദരാബാദ്, രചകൊണ്ട പൊലീസ് സ്റ്റേഷനുകളില്‍ നിരവധി കേസുകളാണ് രജിസ്റ്റർ ചെയ്തിരിക്കുന്നത്. അന്വേഷിച്ചു വന്നപ്പോള്‍ എല്ലാ സംഭവങ്ങളിലും ഒരേ രീതിയില്‍ തന്നെയാണ് തട്ടിപ്പ് നടന്നതും.
കടകളില്‍ വൻതുകയുടെ സാധനങ്ങള്‍ വാങ്ങിയ ശേഷം യുപിഐ വഴിയാണ് പണം നല്‍കുന്നതെന്ന് അറിയിച്ച ശേഷം കടയിലെ യുപിഐ സ്കാനറിന്റെ ചിത്രമെടുത്ത് രാജസ്ഥാനിലുള്ള തങ്ങളുടെ സംഘത്തിലെ മറ്റൊരാളിനാണ് അയച്ചുകൊടുത്തിരുന്നത്. ഇയാള്‍ പണം നല്‍കും. ശേഷം സംഘാംഗങ്ങള്‍ സാധനങ്ങളുമായി സ്ഥലം വിടും.
തൊട്ടുപിന്നാലെ യുപിഐ ഇടപാട് നടത്തിയ ആള്‍, ബാങ്കിന് പരാതി നല്‍കി റീഫണ്ട് ആവശ്യപ്പെടും. സാധരാണ ഗതിയില്‍ ഇടപാടുകള്‍ പരാജയപ്പെടുമ്ബോള്‍ റീഫണ്ടിനായി ബാങ്കിനെ സമീപിക്കാനുള്ള ഓപ്ഷനാണിത്. ബാങ്കിനെ വിശ്വസിപ്പിക്കുന്ന തരത്തില്‍ വ്യാജ പരാതി നല്‍കുകയും അതിലൂടെ പണം റീഫണ്ട് ചെയ്ത് വാങ്ങുകയുമാണ് ചെയ്തിരുന്നതെന്ന് പൊലീസ് കണ്ടെത്തി. ഇതോടെ സാധനങ്ങളുമായി സംഘം കടയില്‍ നിന്നിറങ്ങി കുറച്ച്‌ കഴിയുമ്ബോള്‍ തന്നെ പണവും തിരികെ വാങ്ങും. കടയില്‍ നിന്ന് കിട്ടിയ സാധനങ്ങള്‍ മറിച്ചു വില്‍ക്കുകയും ചെയ്യും.
പ്രമുഖ ഇലക്‌ട്രോണിക്സ് വ്യാപാര ശൃംഖലയായ ബജാജ് ഇലക്‌ട്രോണിക്സിന്റെ വിവിധ ഷോറൂമുകളാണ് തട്ടിപ്പ് സംഘം തെരഞ്ഞെടുത്തത്. അന്വേഷിച്ചെത്തിയപ്പോള്‍ 13 പേർ പിടിയിലായി. ഇവരില്‍ നിന്ന് 1.72 ലക്ഷം രൂപ പണമായും 50 ലക്ഷം രൂപയുടെ ഇലക്‌ട്രോണിക്സ് ഉത്പന്നങ്ങളും പിടിച്ചെടുത്തു. പിടിയിലായ എല്ലാവരും 20നും 25നും ഇടയില്‍ പ്രായമുള്ളവരാണ്. ചിലർ ഹൈദരാബാദിലും മറ്റ് ചിലർ രാജസ്ഥാനിലും ഇരുന്നാണ് ഓപ്പറേഷൻ നടത്തിയിരുന്നത്.