തെറ്റിന്റെ വിപരീതപദമല്ല ശരി. തെറ്റല്ലാത്തതെല്ലാം ശരിയാണെന്നോ ശരിയല്ലാത്തതെല്ലാം തെറ്റാണെന്നോ ദുർവ്യാഖ്യാനം ചെയ്യേണ്ട. ശരികൾ ചില അവസ്ഥാന്തരങ്ങൾ മാത്രം.
അഭിപ്രായങ്ങളിലെയും ചിന്തകളിലെയും വൈരുധ്യം എന്നത് ലോകത്തിന്റെ പൊതുവായ. സ്വഭാവം തന്നെ ആണ്... നമ്മുടെ അഭിപ്രായങ്ങളും തീരുമാനങ്ങളും മാത്രമാണ് ശരി എന്ന് കരുതുന്നതിനു പകരം മറ്റുള്ളവരുടെ അഭിപ്രായങ്ങളെയും നമുക്ക് സ്വീകാര്യമല്ലെങ്കിൽ പോലും ബഹുമാനിക്കാൻ പഠിക്കാം.
ചെറുപ്പം മുതലേ വളരെ ധൈര്യശാലിയായ പെൺകുട്ടി ആയിരുന്നു അവൾ. സാഹസ പ്രവൃത്തികളോടാണു താൽപര്യം കൂടുതൽ. ഒരു കുഞ്ഞിനെ ഉദരത്തിൽ വഹിക്കാൻ തുടങ്ങിയതു മുതൽ അവൾക്കു നിയന്ത്രണങ്ങളായി; മരത്തിൽ കയറരുത്, ശ്‌മശാനത്തിൽ പോകരുത്, പുഴയിൽ നീന്തരുത്. അവൾ എതിർത്തു. ഇതെല്ലാം ഞാൻ നേരത്തേ ചെയ്‌തിരുന്ന കാര്യങ്ങളാണ്. ഇപ്പോൾ എന്തിനാണു തടയുന്നത്?
വീട്ടുകാർ പറഞ്ഞു നിന്റെ ശരികളെല്ലാം നിന്റെ കുഞ്ഞിനു ശരി ആകണമെന്നില്ല.
പലതരം ശരികളുണ്ട്. ആളുകൾക്കും അവസ്ഥകൾക്കും അനുസരിച്ച് അവ മാറിക്കൊണ്ടിരിക്കും. എക്കാലവും ശരി എന്നു കരുതപ്പെടുന്ന ഒന്നും തന്നെയില്ല. സ്വന്തം അനുഭവങ്ങൾക്കും സാഹചര്യങ്ങൾക്കും അനുസരിച്ചാണ് ഓരോരുത്തരും തങ്ങളുടെ ശരികൾ രൂപപ്പെടുത്തുന്നത്. തെറ്റിന്റെ വിപരീതപദമല്ല ശരി. തെറ്റല്ലാത്തതെല്ലാം ശരിയാണെന്നോ ശരിയല്ലാത്തതെല്ലാം തെറ്റാണെന്നോ ദുർവ്യാഖ്യാനം ചെയ്യേണ്ട. ശരികൾ ചില അവസ്ഥാന്തരങ്ങൾ മാത്രം.
പണ്ട് ചൈനയിൽ ഒരു കോടീശ്വരൻ ഉണ്ടായിരുന്നു. അയാൾക്ക് പെട്ടെന്നൊരു. ദിവസം കലശലായ കണ്ണുവേദന വന്നു. പല വൈദ്യന്മാരും മാറിമാറി ചികിത്സിച്ചു . യാതൊരു ഫലവുമുണ്ടായില്ല . വേദന കൂടിക്കൂടി വന്നു. അങ്ങനെയിരിക്കെ സഞ്ചാരിയായി ഒരു സന്യാസി കോടീശ്വരന്റെ വീട്ടിലെത്തുന്നു.വിവരമറിഞ്ഞ അദ്ദേഹം വളരെ ശ്രദ്ധേയമായ ഒരു നിർദ്ദേശം വച്ചു. കോടീശ്വരൻ പച്ചയായത് അല്ലാത്ത ഒന്നും കാണണ്ട . എന്ന് വച്ചാൽ ചുറ്റുപാടും എപ്പോഴും പച്ചനിറം കാണട്ടെ ,വേദന കുറയും.
നിർദ്ദേശം കിട്ടിയപാടെ കോടീശ്വരന്റെ വേലക്കാർ വീടും പരിസരവും മുഴുവൻ പച്ച ചായം തേച്ചു . കോടീശ്വരന്റെ കണ്ണിൽ പെടുന്നവരെയെല്ലാം പച്ച നിറത്തിലാക്കി. കണ്ണുവേദന അത്ഭുതമെന്ന് പറയട്ടെ വളരെ കുറഞ്ഞു . കുറേ നാൾ കഴിഞ്ഞ് നമ്മുടെ ഈ സന്യാസി വീണ്ടും കോടീശ്വരനെ കാണാനെത്തുകയാണ്. സന്യാസിയെ കണ്ട മാത്രയിൽ ജോലിക്കാർ എല്ലാവരും ചേർന്ന് അദ്ദേഹത്തെ പച്ച ഉടുപ്പിടിവിക്കുന്നു പച്ചനിറം കൊണ്ട് അഭിഷേകം ചെയ്യുന്നു .
ഒരു പുഞ്ചിരിയോടെ സന്യാസി കോടീശ്വരനോട്‌ ചോദിക്കുന്നു. ഇത്രയധികം പണം മുടക്കി പച്ച ചായം തേച്ചു പിടിപ്പിക്കേണ്ട വല്ല കാര്യമുണ്ടോ ? വിലകുറഞ്ഞ ഒരു പച്ച കണ്ണട വാങ്ങി വച്ചാൽ പോരെ നിങ്ങൾക്ക് ചുറ്റുപാടുമുള്ളതൊക്കെ പച്ചയായി കാണുമല്ലോ...! ലോകത്തെ മുഴുവൻ പച്ചയാക്കുവാൻ നിങ്ങളെ കൊണ്ട് സാധിക്കുമോ...?
ലോകത്തെ മുഴുവൻ നാം ഇച്ഛിക്കുന്ന രീതിയിലേക്ക് മാറ്റി എടുക്കാൻ നമുക്ക് സാധിക്കില്ല എൻറെ വിശ്വാസം, എന്റെ രാഷ്ട്രീയ ചിന്ത അതൊക്കെയാണ് ശരി മറ്റുള്ളവരെല്ലാം അത് സ്വീകരിച്ചു കൊല്ലണം എന്നു പറയുന്നത് തികഞ്ഞ വിഡ്ഢിത്തമാണ് വിരുദ്ധാഭിപ്രായങ്ങളെ സഹിഷ്ണുതയോടെ കൊണ്ടുപോവുകയാണ് ഏത് വിവേകശാലിയും ചെയ്യേണ്ടത് .
ബ്രിട്ടീഷ് ഭരണത്തെ ഞാൻ എതിർക്കുന്നു എങ്കിലും ബ്രിട്ടീഷുകാരെ ഞാൻ സ്നേഹിക്കുന്നു എന്നു പറഞ്ഞ ഗാന്ധിജിയെ നമുക്ക് ഓർക്കാം.. വെറുക്കുന്നവരെയെല്ലാം ഇല്ലാതാക്കാനുള്ള അവകാശം നമുക്കില്ല എന്നുപറഞ്ഞ ലിങ്കണെ നമുക്ക് ഓർക്കാം.
ഇന്നലെ ശരിയെന്നു കരുതിയിരുന്നവ ഇന്നു തെറ്റാണെന്നു തെളിഞ്ഞിട്ടുണ്ട്; തെറ്റു ശരിയാണെന്നും. ഒരാളുടെ ശരികൾ മറ്റൊരാളുടെ തെറ്റുകളാകാം. ഈ അർഥവ്യത്യാസങ്ങളിൽ നിന്നാണ് അഭിപ്രായ വ്യത്യാസങ്ങളും അത്യാഹിതങ്ങളും ഉടലെടുക്കുന്നത്. അവനവന്റെയും അപരന്റെയും ശരികൾക്കിടയിൽ ഒരു യഥാർഥ ശരി ശ്വാസംമുട്ടുന്നുണ്ടാകും.സ്വന്തം ശരികളെ ഊട്ടിയുറപ്പിക്കാനുള്ള വ്യഗ്രത അന്യന്റെ ശരികളെ അവഗണിക്കാതിരിക്കുന്ന കാര്യത്തിലും ഉണ്ടായാൽ ശരികൾ തമ്മിൽ സമരസപ്പെടുകയും പുതിയ ശരികൾ രൂപപ്പെടുകയും ചെയ്യും. പരസ്‌പര ബഹുമാനത്തിന്റെ ചുവടുകളിൽ നിന്നാണു പരസ്‌പര പൂരകങ്ങളായ ശരികൾ ഉടലെടുക്കുന്നത്.