ബീഫ് ബിരിയാണി തയ്യാറാക്കാം
ഇന്നത്തെ ആഘോഷങ്ങൾക്ക് സ്പെഷ്യല് ഒരു ബിരിയാണി ആയാലോ? അതും കുക്കറിൽ ഉണ്ടാക്കിയ ബീഫ് ബിരിയാണി. അല്പം ക്ഷമ ഉണ്ടങ്കില് ഹോട്ടലില് നിന്നും കിട്ടുന്നതിനേക്കാള് നല്ല ബിരിയാണി നമുക്ക് വീട്ടില് തന്നെയുണ്ടാക്കാം. പാചകം പഠിച്ചു വരുന്നവര്ക്ക് അവധി ദിവസങ്ങളില് വീട്ടിലുള്ളവര്ക്ക് ഒരു സര്പ്രൈസും കൊടുക്കാം. ഇതില് പറയുന്ന രീതിയില് ഉണ്ടാക്കി നോക്കിയാല് നിങ്ങള്ക്കും ഒരു കിടിലന് ബിരിയാണി തയ്യാറാക്കാം. കുക്കറിൽ ഉണ്ടാക്കിയാല് ഒരു പ്രത്യേക ടേസ്റ്റ് തന്നെയാണ് കേട്ടോ. നല്ല ബീഫ് ആണെങ്കില് മട്ടണ് പോലും തോറ്റു പോകും. അപ്പോള് എങ്ങനെയാണ് ഉണ്ടാക്കുന്നതെന്ന് നോക്കാം.
കൊതിയൂറും ബീഫ് ബിരിയാണ് തയ്യാറാക്കാം. അതും കുക്കറിൽ എളുപ്പത്തിൽ തയ്യാറാക്കിയാലോ. ഹോട്ടലില് നിന്നും കിട്ടുന്നതിനേക്കാള് നല്ല ബിരിയാണി നമുക്ക് വീട്ടില് തന്നെയുണ്ടാക്കാം
ആവശ്യമുള്ള ചേരുവകൾ
ബീഫ് -1.5 kg
ബസുമതി റൈസ് - 5 കപ്പ് ( അര മണിക്കൂർ വെള്ളത്തിലിട്ട് കുതിർക്കുക)
സബോള നീളത്തിലരിഞ്ഞത് - രണ്ട് (ഗാർണിഷ് ചെയ്യാൻ)
അണ്ടിപ്പരിപ്പ് - ഒരുപിടി
മുന്തിരി -ഒരു പിടി
നെയ്യ് -ഒരു ടേബിൾസ്പൂൺ
ബീഫ് തയാറാക്കാൻ
സബോള (വലുത് )അരിഞ്ഞത്- രണ്ടെണ്ണം
തക്കാളി മുറിച്ചത്- മൂന്നെണ്ണം
പച്ചമുളക് അരിഞ്ഞത് -നാലെണ്ണം
ഇഞ്ചി -ഒരു കഷ്ണം
വെളുത്തുള്ളി- ഒരു കുടം
മല്ലിയില -ഒരു പിടി
പുതിനയില -ഒരു പിടി
മല്ലിപ്പൊടി -രണ്ട് ടീസ്പൂൺ
മുളകുപൊടി -ഒരു ടീസ്പൂൺ
ഗരം മസാല പൊടി -ഒരു ടീസ്പൂൺ
മഞ്ഞൾ പൊടി -അര ടീസ്പൂൺ
ഉപ്പ് ആവശ്യത്തിന്
തൈര് -മൂന്ന് ടേബിൾ സ്പൂൺ
റൈസിന്
നെയ്യ്- മൂന്ന് ടേബിൾസ്പൂൺ
ബേ ലീവ്സ്- 3
ഗ്രാമ്പൂ- അഞ്ച്
പട്ട -രണ്ട് കഷണം
ഏലക്ക -5
ജാതിപത്രി മൂന്നാല് കഷണം
ജാതിക്ക -1
ഉപ്പ് ആവശ്യത്തിന്
മല്ലിയില -കുറച്ച്
പുതിനയില -കുറച്ച്
തയ്യാറാക്കുന്ന വിധം
ഒരു പ്രഷർകുക്കർ സ്റ്റൗവിൽ വച്ച് ചൂടായാൽ 1 ടേബിൾസ്പൂൺ ഗി ഒഴിച്ചുകൊടുത്തു സബോളയും അണ്ടിപ്പരിപ്പും മുന്തിരിയും വറുത്തു കോരി മാറ്റി വെക്കുക. ഇതേ പ്രഷർകുക്കറിൽ തന്നെ അരിഞ്ഞുവച്ചിരിക്കുന്ന സവാളയും തക്കാളിയും പച്ചമുളകും ഇടുക. ഇഞ്ചിയും വെളുത്തുള്ളിയും തൊലികളഞ്ഞ് ഇതിൻറെകൂടെ മല്ലിയിലയും പുതിനയും തൈരും ചേർത്ത് അടിച്ച് (5 ഇൻഗ്രീഡിയൻസ്) കുക്കറിലേക്ക് ഒഴിച്ചുകൊടുക്കുക. ഇതിലേയ്ക് കഴുകി വൃത്തിയാക്കി വെച്ചിരിക്കുന്ന ബീഫ് ഇടുക.
തയ്യാറാക്കി വച്ചിരിക്കുന്ന മല്ലിപ്പൊടിയും മഞ്ഞൾപൊടിയും ഗരംമസാല പൊടിയും മുളകുപൊടിയും ഇടുക. ആവശ്യത്തിന് ഉപ്പുചേർക്കുക. അരക്കപ്പ് വെള്ളം കൂടി ചേർത്ത് നല്ലപോലെ മിക്സ് ആക്കി കു ക്കർ മൂടിവെച്ച് ആറേഴു വിസിൽ വരുത്തുക.
പ്രഷർ മുഴുവൻ റിലീസായതിനുശേഷം കുക്കർൻറെ മൂടി തുറന്നു ഇതിൽ നിന്നും ഗ്രേവി ഊറ്റിയെടുത്തു അതിലേക്ക് 10 കപ്പ് വെള്ളം തികക്കാൻ ബാക്കി വെള്ളം കൂടി ചേർത്ത് ( അരിയുടെ ഇരട്ടി വെള്ളം) കുക്കറിലേക്ക് തന്നെ ഒഴിക്കുക. ഇതിലേക്ക് ഏലക്കയും ഗ്രാമ്പൂവും ബേ ലീവ്സും ജാതിക്കയും ജാതിപത്രിയും നെയ്യും ചേർക്കുക. കഴുകി വച്ചിരിക്കുന്ന അരി ഇടുക. കുറച്ചു മല്ലിയില പൊതിനയില ഇട്ടു കുക്കർ വീണ്ടും മൂടിവെച്ച്ഹൈ ഫ്ളേമില് വിസിലിന് തൊട്ടുമുൻപ് ഓഫ് ചെയ്ത്കുക്കര് മാറ്റി വെയ്കുക.
പ്രഷർ മുഴുവൻ റിലീസായതിനുശേഷം കുക്കർ മൂടിതുറന്ന് സെർവ് ചെയ്യാം. വറുത്തുവച്ചിരിക്കുന്ന അണ്ടിപ്പരിപ്പും മുന്തിരിയും സവാളയും മേലെ ചേർക്കുക.