കുട്ടികള്ക്ക് മിഠായിയും പിസയും അല്ല വേണ്ടത്; തലച്ചോറിന്റെ ആരോഗ്യത്തിന് വേണ്ടത് ഈ ഭക്ഷണങ്ങൾ എന്തെല്ലാമാണെന്ന് അറിയാം
കുട്ടികളുടെ ആരോഗ്യകാര്യത്തിലാണ് അമ്മമാർക്ക് ഏറ്റവും അധികം ശ്രദ്ധ. അവർക്ക് വേണ്ട പോഷകങ്ങൾ സമയത്തിന് ലഭ്യമാകുന്നുണ്ടോ എന്ന കാര്യം അമ്മമാരെ നിരന്തരം അലട്ടിക്കൊണ്ടേയിരിക്കും. അതുകൊണ്ട് തന്നെ അവർക്ക് വേണ്ട ഭക്ഷണം തിരഞ്ഞെടുക്കാൻ ഓരോ അമ്മയും പ്രത്യേകം ശ്രദ്ധാലുവാണ്.
കുട്ടികളിലും കൗമാരക്കാരിലും അവരുടെ ആരോഗ്യ കാര്യത്തിൽ ഈ പോഷകങ്ങൾ ഒരു പ്രധാന പങ്ക് വഹിക്കുന്നു. ഉദാഹരണത്തിന്, ബലമുള്ള അസ്ഥികൾ ഉണ്ടാകുന്നതിന് ആവശ്യമായ പോഷകങ്ങളിൽ ഒന്നാണ് വിറ്റാമിൻ ഡി. അതുപോലെ തന്നെ, കുട്ടികൾക്കും കൗമാരക്കാർക്കും ആരോഗ്യകരമായ വളർച്ച കൈവരിക്കാൻ ആവശ്യമായ മറ്റ് വിറ്റാമിനുകളും ധാതുക്കളും ഉണ്ട്. ഇത് ലഭിക്കുന്നതിനായി പോഷകങ്ങൾ അടങ്ങിയ ഭക്ഷ്യവസ്തുക്കൾ അവരുടെ ഭക്ഷണക്രമത്തിൽ ചേർക്കണം, അങ്ങനെ ഓരോ പോഷകത്തിന്റെയും ആവശ്യമായ അളവ് അവർക്ക് ദിവസവും ലഭിക്കുന്നതാണ്.
ആരോഗ്യമുള്ള ശരീരത്തിന് വിറ്റാമിനുകളിൽ നിന്നും ധാതുക്കളിൽ നിന്നുമുള്ള പോഷകങ്ങൾ ആവശ്യമാണ്. നല്ല ആരോഗ്യം പ്രോത്സാഹിപ്പിക്കുന്നതിന് നിങ്ങൾ ദിവസവും കഴിക്കുന്ന ഭക്ഷണങ്ങളിൽ നിന്ന് ഈ പോഷകങ്ങൾ ശരീരത്തിന് ലഭിക്കുന്നു. അവ എല്ലുകളെ ശക്തമാക്കുന്നു, ഹൃദയാരോഗ്യം നിയന്ത്രിക്കുന്നു, ശരീരത്തിലെ രക്തയോട്ടം സാധാരണ നിലയിലാക്കുന്നു, വിട്ടുമാറാത്ത രോഗങ്ങളിൽ നിന്ന് നമ്മെ രക്ഷിക്കുന്നു, ദഹന പ്രക്രിയ മെച്ചപ്പെടുത്തുന്നു.
കുട്ടികൾക്ക് ഏറെയിഷ്ടമുള്ളതാണ് മിഠായിയും പിസയും ബർഗറും തുടങ്ങിയ പുറത്തുനിന്നുള്ള ഭക്ഷണങ്ങൾ. കുട്ടികൾക്ക് എന്തെങ്കിലും വാങ്ങി നൽകണമെന്ന് കരുതിയാലും ഭൂരിഭാഗം പേരും മിഠായിപോലെയുള്ള ഭക്ഷണങ്ങളാണ് അധികവും വാങ്ങുക. എന്നാൽ ആറു മുതൽ 12 വരെയുള്ള കുഞ്ഞുങ്ങൾക്ക് ഇത്തരം ഭക്ഷണങ്ങൾ കൊടുക്കുന്നത് ഒഴിക്കാക്കുന്നത് നല്ലതായിരിക്കും. കുട്ടികളുടെ തലച്ചോറിന്റെ വളർച്ചയുടെ പ്രധാനഘട്ടമാണിത്
ഈ സമയത്ത് പോഷകസമ്പന്നമായ ഭക്ഷണമാണ് അവർക്ക് നൽകാൻ ശ്രദ്ധിക്കേണ്ടത്. ചോക്ലേറ്റ്,കുക്കീസ്, പ്രോസസ്ഡ് ഭക്ഷണങ്ങൾ , നൂഡിൽസ്, എനർജി ഡ്രിങ്കുകൾ തുടങ്ങിയവ പരമാവധി ഒഴിവാക്കണം. ഇവ കുഞ്ഞുങ്ങളുടെ തലച്ചോറിന്റെ ആരോഗ്യത്തെയും ശാരീരികാരോഗ്യത്തെയും ഉറക്കത്തെയുമെല്ലാം ഹാനികരമായി ബാധിക്കും. കുട്ടികളുടെ തലച്ചോറിന്റെ ആരോഗ്യത്തിനായി കൊടുക്കേണ്ട ചില ഭക്ഷണങ്ങളെ അറിഞ്ഞിരിക്കാം.
പ്രധാനമായും വീട്ടിലുണ്ടാക്കുന്ന ഭക്ഷണങ്ങൾ കുഞ്ഞുങ്ങൾക്ക് നൽകി ശീലിപ്പിക്കണം. അതിനൊടൊപ്പം ആവശ്യമായ അളവിൽ വെള്ളവും കുടിക്കുന്നുവെന്ന് ഉറപ്പ് വരുത്തണം. കുഞ്ഞുങ്ങൾക്ക് ഓർമ്മശക്തി, പ്രശ്നപരിഹാരത്തിനുള്ള കഴിവ്, ശ്രദ്ധ എന്നിവ വികസിക്കുന്നതിന് ഒമേഗ-3 ഫാറ്റി ആസിഡ് ആവശ്യമാണ്. കൊഴുപ്പ് അടങ്ങിയ മത്സ്യങ്ങളായ സാൽമൺ, മത്തി, ചൂര , ചണവിത്ത്, സൂര്യകാന്തി വിത്ത്, മത്തങ്ങക്കുരു, വാൾനട്ട്സ് എന്നിവയെല്ലാം കുട്ടികൾക്ക് നൽകണം.
കുട്ടികളുടെ വളർച്ചയിൽ നിർബന്ധമായും ആവശ്യമായ ഒന്നാണ് ഇരുമ്പ്. പ്രത്യേകിച്ച് തലച്ചോറിന്റെ വികാസത്തിന് ഇരുമ്പ് അടങ്ങിയ ഭക്ഷണം കുട്ടികൾക്ക് നൽകേണ്ടതുണ്ട്. ഇലക്കറികൾ, ബീൻസ്, വൻപയർ, ഗ്രീൻ പീസ്, കടല തുടങ്ങിയവയെല്ലാം ഇതിനായി നൽകാം.
തലച്ചോറിന്റെ മൊത്തത്തിലുള്ള വളർച്ചയ്ക്കും വികാസത്തിനും ആന്റി-ഓക്സിഡന്റ്സ് ആവശ്യമാണ്. പല നിറങ്ങളുള്ള പച്ചക്കറികളിൽ നിന്നും പഴങ്ങളിൽ നിന്നുമാണ് ആന്റി-ഓക്സിഡന്റ്സ് പ്രധാനമായും ലഭിക്കുക. ബീറ്റ്റൂട്ട്, കാരറ്റ്, തക്കാളി, പ്ലം, ബെറി, പാലക് എന്നിവയെല്ലാം ഇതിനായി കുട്ടികളുടെ ഭക്ഷണത്തിൽ ഉൾപ്പെടുത്താം.
കുട്ടികളുടെ പ്രാതലിന്റെ കാര്യവും കൃത്യമായി ശ്രദ്ധിക്കേണ്ടതുണ്ട്. ആരോഗ്യം ഉറപ്പുവരുത്തുന്ന ഭക്ഷണം വേണം കുട്ടികൾക്ക് നൽകേണ്ടത്. പോഷകസമൃദ്ധമായ ഭക്ഷണം അവർക്ക് നൽകാൻ പലതരത്തിലുള്ള പച്ചക്കറികളും പഴങ്ങളും ഇതിനായി ഉപയോഗിക്കാം. വീട്ടിലുണ്ടാക്കിയ ഭക്ഷണം തന്നെ നൽകേണ്ടതുണ്ട്.
ശ്രദ്ധിക്കുക : അറിവിനെ ജനകീയമാക്കുക എന്ന ലക്ഷ്യം മാത്രമാണ് ഈ പോസ്റ്റിന് ഉള്ളത്.രോഗനിർണ്ണയത്തിനും ചികിത്സയ്ക്കും പകരമാകാൻ ഉദ്ദേശിച്ചുള്ളതല്ല, കൃതഹസ്തരായ ചികിത്സകരുടെ ഉപദേശപ്രകാരം മാത്രം ഔഷധങ്ങൾ ഉപയോഗിക്കുക. കൂടുതൽ പഠനം നടത്തി നല്ലത് മാത്രം സ്വീകരിക്കുക.ആരോഗ്യവിദഗ്ധന്റെയോ ന്യൂട്രീഷനിസ്റ്റിന്റെയോ ഉപദേശം തേടിയശേഷം മാത്രം ആഹാരക്രമത്തില് മാറ്റം വരുത്തുക.