ശരിയായ രീതിയിലുള്ള ചില ശീലങ്ങള് പിന്തുടർന്നാല് സന്തോഷത്തോടെ ആരോഗ്യത്തോടെയും ദീർഘകാലം ജീവിക്കാം. പലപ്പോഴും ആളുകള്ക്ക് നേരമില്ലാത്താണ് ഒരു പക്ഷെ ശരിയായ ശീലങ്ങള് പിന്തുടരാൻ കഴിയാതെ വരുന്നത്.
സങ്കടങ്ങൾ എത്രസമയം മനസ്സിൽ സൂക്ഷിക്കുന്നുവോ അതിനനുസരിച്ച് മനസ്സിന്റെ ഭാരം കൂടി അസ്വസ്ഥതകളും അസമാധാനവും പെരുകും. ഒരു പ്രശ്നം ഉണ്ടാകുമ്പോൾ നിരന്തരം അതിനേക്കുറിച്ച് ആലോചിച്ച് വ്യസനിക്കാതെ ചെറിയ ബ്രേക്കെടുത്തശേഷം വീണ്ടും അതേ പ്രശ്നത്തെ നേരിടുമ്പോൾ പരിഹാരം എളുപ്പത്തിൽ കണ്ടെത്താൻ സാധിക്കും. ജീവിതത്തിൽ നിത്യേനയെന്നോണം പുതിയ വെല്ലുവിളികളെ അഭിമുഖീകരിക്കേണ്ടി വരുമ്പോൾ സമചിത്തത കൈമോശം വരാതിരിക്കാനുള്ള ചില നിർദേശങ്ങളാണ് ഇനി പറയുന്നത്.
മനസിനും ശരീരത്തിനും അതുപോലെ ചർമ്മത്തിനുമൊക്കെ ഒരു പോലെ ഗുണം തരുന്ന ചില നല്ല കാര്യങ്ങള് ദൈനംദിനത്തില് പിന്തുടരാൻ ശ്രമിക്കുക.
കൃത്യ സമയത്ത് എഴുന്നേല്ക്കാനും അതുപോലെ ഉറങ്ങാനും ശ്രമിക്കണം. സമ്മർദ്ദം കുറയ്ക്കാനും അതുപോലെ മൊത്തത്തിലുള്ള പ്രകടനത്തിനും ഉറക്കം വളരെ പ്രധാനമാണ്. ദിവസവും ഏഴ് മുതല് എട്ട് മണിക്കൂർ ഉറങ്ങാൻ ശ്രമിക്കണം. മൂഡ് നേരെയാക്കാനും ഇത് വളരെയധികം സഹായിക്കും. കിടക്കുന്നതിന് ഒരു മണിക്കൂർ മുൻപ് ടിവി മൊബൈല് എന്നിവയൊന്നും ഉപയോഗിക്കാൻ പാടില്ല.
വ്യായാമം ചെയ്യുന്നത് ആരോഗ്യത്തിന് വളരെ നല്ലതാണെന്ന് എല്ലാവർക്കുമറിയാം. ഇതൊരു ശീലമാക്കാൻ ശ്രമിക്കുക. ദിവസവും ഒരു മണിക്കൂർ വ്യായാമം ചെയ്യാൻ ശ്രമിക്കുന്നത് നല്ലതാണ്. ഫിസിക്കലി ഫിറ്റാകാൻ കഴിയുന്ന നല്ലൊരു വ്യായാമം കണ്ടെത്തുക. നീന്തല്, ഓട്ടം, വെയ്റ്റ് എടുക്കുക തുടങ്ങി പ്രൊഫഷണല് സഹായത്തോടെ വ്യായാമം ചെയ്യാൻ ശ്രമിക്കുക. ദിവസവും എന്തെങ്കിലും പുസ്തകത്തിൻ്റെ പത്ത് പേജ് എങ്കിലും വായിക്കാൻ ശ്രമിക്കണം. വായിക്കുന്നത് മനസിനെ കൂടുതല് ബലപ്പെടുത്താൻ സഹായിക്കും. ലക്ഷ്യങ്ങളും അറിവും ഉയർത്താൻ വായന വളരെ പ്രധാനമാണ്. ആത്മവിശ്വാസം കൂട്ടാനും വായനയ്ക്ക് കഴിയും. ഒരുപാട് ഒന്നും വായിക്കാൻ കഴിഞ്ഞില്ലെങ്കിലും പത്ത് പേജ് എങ്കിലും വായിക്കുന്നത് ജീവിതത്തില് വളരെ പ്രധാനമാണ്.
ദിവസവും 10 മിനിറ്റ് നിശബ്ദമായി ഇരിക്കാൻ ശ്രമിക്കുക. മനസില് ആയിരം ചിന്തികളായിരിക്കും എപ്പോഴും ഉണ്ടായിരിക്കുക. ഇതില് നിന്ന് മനസിന് ഒരു ആശ്വാസം നല്കാൻ ശ്രമിക്കുക. മെഡിറ്റേഷൻ പോലെയുള്ള ഇത്തരം കാര്യങ്ങള് മനസിന് ശാന്തത നല്കാൻ സഹായിക്കുന്നതാണ്. മനസിന് ഇടയ്ക്കൊക്കെ ഒരു ഇടവേള നല്കേണ്ടത് വളരെ പ്രധാനമാണ്.
ദിവസം ആരംഭിക്കുമ്പോൾ ആദ്യം ഏറ്റവും എളുപ്പമുള്ള കാര്യങ്ങൾ ചെയ്യാനാകും തോന്നുക. എന്നാൽ ഏറ്റവും പ്രയാസമുള്ള കാര്യം ആദ്യം ചെയ്യുക. എളുപ്പമുള്ളവ അവസാനത്തേക്ക് മാറ്റിവയ്ക്കുക. രാവിലത്തെ ഊർജസ്വലത ബുദ്ധിമുട്ടേറിയ കാര്യങ്ങൾ ചെയ്തുതീർക്കാൻ വിനിയോഗിക്കാം.
നിയന്ത്രണാതീതമായ കാര്യങ്ങളെ ഓർത്ത് ആകുലപ്പെട്ട് സമയം പാഴാക്കരുത്. പകരം സാഹചര്യങ്ങളെ എങ്ങനെ ഫലപ്രദമാക്കിമാറ്റാം എന്ന് ചിന്തിക്കണം. ഉദാഹരണത്തിന്, സുഹൃത്തുമൊത്ത് നടക്കാൻ പോകാൻ തീരുമാനിച്ചശേഷം പുറത്തേക്കിറങ്ങുമ്പോൾ മഴപെയ്തു. ഉടനെ മഴയെ കുറ്റം പറയാതെ ആ സമയം വീട്ടിൽ തന്നെ എങ്ങനെ രസകരമായി ചെലവഴിക്കാം എന്ന് ആലോചിക്കണം.
മറ്റുള്ളവർ എന്തുവിചാരിക്കുമെന്ന ചിന്ത വേണ്ട. നിങ്ങളുടെ അഭിരുചിക്കും ഇഷ്ടത്തിനും അനുസരിച്ച് പ്രവർത്തിക്കുക.
മറ്റുള്ളവരെ അനുകരിക്കാൻ ശ്രമിക്കാതെ സ്വന്തം വ്യക്തിത്വത്തിന് പ്രാധാന്യം നൽകുക.
ഇഷ്ടമില്ലാത്ത കാര്യം ചെയ്യാൻ മറ്റൊരാൾ നിർബന്ധിക്കുമ്പോൾ ശാന്തമായി 'നോ' പറയാൻ ശീലിക്കുക.
പ്രകൃതിയെ ആസ്വദിക്കുക. രാവിലെ എഴുന്നേറ്റാലുടൻ അല്പസമയം കിളികളുടെയും മറ്റും ശബ്ദം ശ്രദ്ധിക്കാം. അക്വേറിയത്തിലും കുളത്തിലും മറ്റും മത്സ്യങ്ങൾ നീന്തുന്നത് നിരീക്ഷിക്കാം. ഓമനമൃഗങ്ങളെ ലാളിക്കാം. ഇതെല്ലാം മനസ്സിനെ തരളിതവും ശാന്തവുമാക്കും.
ശ്രദ്ധ നഷ്ടപ്പെടുന്നു എന്ന് തോന്നുമ്പോൾ പ്രകൃതിയിലേക്ക് നോക്കുക.
ദീർഘനിശ്വാസമെടുത്തുകൊണ്ട് ശ്വസനത്തിൽ ശ്രദ്ധ കേന്ദ്രീകരിക്കുക.
രാവിലെയോ വൈകുന്നേരമോ നല്ല പച്ചപ്പുള്ള സ്ഥലത്തുകൂടി ശുദ്ധവായു ശ്വസിച്ചുകൊണ്ട്, കൈവീശി നടക്കുക. ഇടയ്ക്ക് പരിചയക്കാരുമായി സംസാരിക്കുകയുമാവാം.
അശാന്തമായ അവസ്ഥയിലും യാത്രചെയ്യുമ്പോഴുമൊക്കെ ഇഷ്ടപ്പെട്ട ഗാനങ്ങൾ കേൾക്കുക.
ലാപ്ടോപ്, മൊബൈൽ ഫോൺ, ടേബിൾ, ഷെൽഫ്, വീട്, ഓഫീസ് എന്നിവിടങ്ങളിൽനിന്നെല്ലാം ആവശ്യമില്ലാത്തത് നീക്കംചെയ്ത് ഇടയ്ക്കിടെ വൃത്തിയാക്കാം. ഇത് ചുറ്റുപാടുകൾക്കും ഉപയോഗിക്കുന്ന വസ്തുക്കൾക്കും മാത്രമല്ല, മനസ്സിനും ഫ്രഷ്നസ് നൽകും.
നമ്മളുടെ ഇപ്പോഴത്തെ അവസ്ഥ എന്താണോ അത് അംഗീകരിക്കാനും സ്വയം സ്നേഹിക്കാനും ശീലിക്കണം. അങ്ങനെ പ്രവർത്തിക്കുമ്പോൾ മാത്രമേ പുരോഗതി ഉണ്ടാകൂ.
ശുഭപ്രതീക്ഷ നിലനിർത്തുക. അതേ സമയം അമിത പ്രതീക്ഷകൾ അരുത്. ചിലപ്പോഴെങ്കിലും പ്രതീക്ഷയ്ക്ക് വിരുദ്ധമായതും സംഭവിച്ചേക്കാം എന്ന യാഥാർഥ്യബോധത്തോടെ ജീവിക്കുക.
ജീവിതത്തിലെ വ്യത്യസ്ത മേഖലകളിലും വ്യത്യസ്ത റോളുകളിലും ലക്ഷ്യങ്ങൾ നിശ്ചയിച്ച് അതിനായി പ്രയത്നിക്കുക.
കഴിഞ്ഞകാല ജീവിതത്തെ ഓർത്ത് ആകുലപ്പെടുകയോ ഭാവിയെക്കുറിച്ചോർത്ത് ആശങ്കപ്പെടുകയോ ചെയ്യാതെ 'ഇന്ന്' ജീവിക്കുക.
പരാജയങ്ങളിൽനിന്ന് പാഠം ഉൾക്കൊള്ളാം. നിങ്ങളല്ല പരാജയപ്പെട്ടത്, മറിച്ച് നിങ്ങളുടെ ഒരു ശ്രമം മാത്രമാണെന്ന് മനസ്സിലാക്കി, പോരായ്മകൾ തിരുത്താൻ ശ്രമിക്കാം.
വെല്ലുവിളികൾ ഏറ്റെടുത്ത് ചെയ്യുക. എനിക്കത് ചെയ്യാമായിരുന്നു എന്ന ചിന്ത പിന്നീട് വരാതിരിക്കാൻ ഈ പ്രയത്നം സഹായിക്കും.
നല്ല ഭക്ഷണം കഴിക്കുകയും നന്നായി ഉറങ്ങുകയും ചെയ്യുക.