മകളുടെ ഒരുനിമിഷത്തെ അവസരോചിത ഇടപെടലില്‍ ഓട്ടോറിക്ഷയ്ക്ക് അടിയില്‍പ്പെട്ട അമ്മയ്ക്ക് കിട്ടിയത് പുതുജീവൻ.
മംഗളൂരു: കിന്നിഗോളി-കട്ടീല്‍ റോഡില്‍ രാമനഗരയില്‍ കഴിഞ്ഞദിവസം രാവിലെയാണ് അപകടം. റോഡ് മുറിച്ചുകടക്കുന്നതിനിടെ രാജരത്നപുര സ്വദേശി ചേതനയെ അമിതവേഗത്തില്‍ വന്ന ഓട്ടോറിക്ഷ ഇടിച്ചു. ഇടിയില്‍ മറിഞ്ഞ റിക്ഷയ്ക്ക് അടിയില്‍ ചേതന കുടുങ്ങി. ഈസമയം അപകടം കണ്ട് ചേതനയുടെ മകള്‍ ഏഴാംക്ലാസുകാരി വൈഭവി ബസ് കാത്തുനില്‍ക്കുന്നുണ്ടായിരുന്നു.
അപകടം നടന്നയുടനെ വൈഭവി റിക്ഷയ്ക്കരികിലേക്ക് ഓടിയെത്തുകയും റിക്ഷ ഉയർത്തി അമ്മയെ രക്ഷിക്കുകയുമായിരുന്നു. തൊട്ടടുത്ത കടയിലെ സി.സി.ടി.വി. ക്യാമറയില്‍ ഈ ദൃശ്യങ്ങള്‍ പതിയുകയും സ്വന്തം അമ്മയെ രക്ഷിച്ച മകളുടെ വീഡിയോ വൈറലാകുകയും ചെയ്തു. അമ്മ ആശുപത്രിയില്‍ ചികിത്സയിലാണ്.
പാത മുറിച്ചു കടക്കുന്നതിനിടെ ഓട്ടോ ഇടിച്ച്‌ വീണ മാതാവിനെ രക്ഷിച്ച ഏഴാം ക്ലാസ് വിദ്യാർഥിനി വൈഭവിക്ക് അനുമോദനം അറിയിച്ച്‌ മുഖ്യമന്ത്രിയും.
മറിഞ്ഞ ഓട്ടോ ഉയർത്തിപ്പിടിച്ച്‌ മാതാവിനെ പുറത്തെടുത്ത് വൈഭവി ആശുപത്രിയില്‍ എത്തിച്ചതിന്റെ സി.സി.ടി.വി ദൃശ്യങ്ങള്‍ സമൂഹ മാധ്യമങ്ങളില്‍ പ്രചരിച്ചിരുന്നു.
ഇതിന് പിന്നാലെയാണ് സിദ്ധരാമയ്യ അനുമോദിച്ച്‌ ട്വീറ്റ് ചെയ്തത്. മംഗളൂരുവിനടുത്ത കിന്നിഗോളി രാമനഗരയില്‍ ട്യൂഷൻ കഴിഞ്ഞ് ഇറങ്ങിയ വൈഭവിയെ കൊണ്ടുപോവാൻ വരുകയായിരുന്നു മാതാവ് രേവതി. അപകടം കണ്ടയുടൻ തന്റെ പരമാവധി ശക്തി ഉപയോഗിച്ച് ഓട്ടോറിക്ഷ ഉയർത്തിപ്പിടിച്ച്‌, ഞെരിയുകയായിരുന്ന മാതാവിനെ രക്ഷിച്ചു.
കാഴ്ചക്കാരിലധികവും രംഗം വിഡിയോയില്‍ പകർത്താൻ ശ്രദ്ധിച്ചപ്പോള്‍ ഏതാനും പേർ വൈഭവിയുടെ സഹായത്തിനെത്തി. നട്ടെല്ലിന് ക്ഷതമേറ്റ മാതാവ് രേവതി സൂറത്ത്കല്‍ ആശുപത്രിയില്‍ ചികിത്സയിലാണ്.
പെണ്‍കുട്ടിയുടെ മനഃസാന്നിധ്യത്തേയും ധൈര്യത്തേയും അനുമോദിച്ച്‌ മുഖ്യമന്ത്രി ട്വീറ്റ് ചെയ്തു. ''അപകടം കണ്ടവർ രക്ഷാപ്രവർത്തനത്തിന് പകരം രംഗം അവരവരുടെ ഫോണില്‍ വിഡിയോ എടുക്കുന്നതാണ് ഞാൻ മാധ്യമങ്ങളില്‍ കണ്ടത്. ഭാവിയെക്കുറിച്ച്‌ ആശങ്കയുണർത്തുന്ന വളരെ മോശം പ്രവണതയാണിത്. ഓരോ നിമിഷവും നിർണായകമാവുന്ന വാഹനാപകടം, തീപിടിത്തം, ഹൃദയാഘാതം തുടങ്ങിയ സന്ദർഭങ്ങളില്‍ മാനവികത എങ്ങനെ ഉണർന്നുപ്രവർത്തിക്കണം എന്നതിന് ഉദാത്ത മാതൃകയാണ് ഈ പെണ്‍കുട്ടി'' -മുഖ്യമന്ത്രി ട്വീറ്റ് ചെയ്തു.