വേഗം ജ്വല്ലറിയിലേക്ക് വിട്ടോ...സ്വർണ്ണ വില ഈ മാസത്തെ ഏറ്റവും താഴ്ചയില്‍

കേരളത്തില്‍ സ്വര്‍ണവിലയില്‍ വന്‍ ഇടിവ്. വില മുന്നേറുമെന്നായിരുന്നു കഴിഞ്ഞ ദിവസം വരെയുള്ള പ്രചാരണം.എന്നാൽ 

അപ്രതീക്ഷിത മാറ്റമാണ് വിപണിയില്‍ ഉണ്ടായിരിക്കുന്നത്. 

അമേരിക്കന്‍ കേന്ദ്ര ബാങ്കായ ഫെഡറല്‍ റിസര്‍വിന്റെ പുതിയ നീക്കങ്ങള്‍ വിപണിയില്‍ ആശങ്ക സൃഷ്ടിച്ചിട്ടുണ്ട്. അതേസമയം, ഡോളര്‍ വന്‍ കരുത്ത് നേടുകയാണ്. ഇന്ത്യന്‍ രൂപ മൂക്കുകുത്തി വീഴുകയും ചെയ്തു.

ആഗോള വിപണിയില്‍ സ്വര്‍ണവില വലിയ ഇടിവ് രേഖപ്പെടുത്തിയ ശേഷം നേരിയ മുന്നേറ്റം നടത്തുന്നുണ്ട്. ക്രൂഡ് ഓയില്‍ വില മാറ്റം രേഖപ്പെടുത്താതെ നില്‍ക്കുകയാണ്. അമേരിക്കന്‍ ഡോളര്‍ റെക്കോര്‍ഡ് മുന്നേറ്റം നടത്തിയപ്പോള്‍ ഇന്ത്യന്‍ രൂപ ചരിത്രത്തിലെ ഏറ്റവും ഇടിവ് രേഖപ്പെടുത്തി. ക്രിപ്‌റ്റോ കറന്‍സിയായ ബിറ്റ് കോയിനും വില താഴ്ന്നു. അറിയാം പുതിയ സ്വര്‍ണവില സംബന്ധിച്ചും ഇടിയാനുള്ള കാരണങ്ങളും...

കേരളത്തില്‍ ഇന്ന് ഒരു പവന്‍ സ്വര്‍ണത്തിന് 56560 രൂപയാണ് വില. ഈ മാസം രേഖപ്പെടുത്തുന്ന ഏറ്റവും കുറഞ്ഞ വിലയാണിത്. ഇന്ന് 520 രൂപ കുറഞ്ഞിട്ടുണ്ട്. ഗ്രാമിന് 65 രൂപ താഴ്ന്ന് 7070 എന്ന നിരക്കിലെത്തി. 18 കാരറ്റ് സ്വര്‍ണം ഗ്രാമിന് 50 രൂപ കുറഞ്ഞ് 5840 രൂപയായി. വെള്ളിയുടെ വിലയിലും ഇന്ന് കുറവുണ്ടായി. ഗ്രാമിന് രണ്ട് രൂപ കുറഞ്ഞ് 95 രൂപയിലെത്തി.

കേരളത്തില്‍ ഈ മാസം രേഖപ്പെടുത്തിയ ഏറ്റവും ഉയര്‍ന്ന പവന്‍ നിരക്ക് 58280 രൂപയായിരുന്നു. അതുമായി താരതമ്യം ചെയ്യുമ്ബോള്‍ ഇന്ന് 1720 രൂപയുടെ കുറവുണ്ട്. ആഗോള വിപണിയില്‍ സ്വര്‍ണം ഔണ്‍സിന് 2600 ഡോളറിന് താഴേക്ക് വീണ ശേഷം അല്‍പ്പം കയറി. നിലവില്‍ 2610 ഡോളറാണ് ഔണ്‍സ് വില. ബിറ്റ് കോയിന്‍ വില കഴിഞ്ഞ ദിവസങ്ങളില്‍ കുതിച്ചിരുന്നു എങ്കിലും ഇന്ന് 101169 ഡോളര്‍ എന്ന നിരക്കിലാണുള്ളത്.

ഫെഡറല്‍ റിസര്‍വ് പലിശ നിരക്ക് കുറയ്ക്കാന്‍ കഴിഞ്ഞ ദിവസം തീരുമാനിച്ചിരുന്നു. 25 ബേസിസ് പോയന്റ് കുറവ് വരുത്താനാണ് തീരുമാനിച്ചത്. ഇത് നേരത്തെ പ്രതീക്ഷിച്ചതായതിനാല്‍ വലിയ മാറ്റം വിപണിയില്‍ ഉണ്ടാകുമായിരുന്നില്ല. എന്നാല്‍ അടുത്ത വര്‍ഷം പലിശ നിരക്കില്‍ അടിക്കടി മാറ്റമുണ്ടാകില്ലെന്ന് ഫെഡ് റിസര്‍വ് സൂചിപ്പിച്ചതാണ് വിപണിയെ തകിടം മറിച്ചത്.

2015ല്‍ നാല് തവണയായി പലിശ നിരക്ക് കുറയ്ക്കുമെന്നാണ് നേരത്തെ നിക്ഷേപകര്‍ പ്രതീക്ഷിച്ചിരുന്നത്. എന്നാല്‍ രണ്ട് തവണ മാത്രമേ മാറ്റം വരുത്തൂ എന്നാണ് പുതിയ വിവരം. ഇതോടെ കമ്ബനികള്‍ക്ക് പ്രതീക്ഷിത ലാഭമുണ്ടാകില്ലെന്നാണ് കരുതുന്നത്. എന്നാല്‍ ഫെഡ് റിസര്‍വിന്റെ തീരുമാനം വന്ന പിന്നാലെ ഡോളര്‍ കരുത്ത് വര്‍ധിപ്പിച്ചു. ഡോളര്‍ സൂചിക 108.09 എന്ന നിരക്കിലെത്തി.

ഏറെ കാലത്തിന് ശേഷമാണ് ഡോളര്‍ സൂചിക ഇത്രയും ഉയര്‍ന്ന നിരക്കിലെത്തുന്നത്. ഇതോടെ മറ്റു കറന്‍സികളെല്ലാം താഴ്ന്നു. അവ ഉപയോഗിച്ചുള്ള സ്വര്‍ണം വാങ്ങല്‍ കുറഞ്ഞു. ഇന്ത്യന്‍ രൂപ ചരിത്രത്തിലെ ഏറ്റവും വലിയ ഇടിവായ 85 ല്‍ താഴേക്ക് പോയി. ക്രൂഡ് ഓയില്‍ വില ബ്രെന്റ് ഇനം ബാരലിന് 73 ഡോളറില്‍ നില്‍ക്കുകയാണ്. വരുംദിവസങ്ങളില്‍ വിപണി സ്ഥിരത കൈവരിക്കുമെന്നാണ് കരുതുന്നത്.