എന്നാല്‍ ഡയപ്പറുകള്‍ വേണ്ടെന്ന് വെക്കാനും കഴിയില്ല. ഇന്ന് നമ്മുടെ സമൂഹത്തില്‍ ഒഴിച്ചുകൂടാൻ പറ്റാത്ത ഒരു അവശ്യവസ്തുവായി ഡയപ്പറുകള്‍ മാറിയിരിക്കുന്നു. അതിനാല്‍ത്തന്നെ ഇതിൻ്റെ ഉപയോഗശേഷം ഡയപ്പറുകള്‍ എങ്ങനെ ഡിസ്പോസ് ചെയ്യണമെന്നും മനസ്സിലാക്കേണ്ടത് അത്യാവശ്യമാണ്. ഡയപ്പറുകള്‍ ഡിസ്പോസ് ചെയ്യുന്നത് എങ്ങനെ? അതിനെക്കുറിച്ചാണ് ഇവിടെ വിശദമായി പറയുന്നത്.
കുഞ്ഞുങ്ങളുള്ള വീട്ടിലെ ഏറ്റവും വലിയ ജോലികളില്‍ ഒന്നാണ് ഡയപ്പർ ഡിസ്പോസ് ചെയ്യല്‍. ചില ആളുകള്‍ രാത്രിയുടെ മറവില്‍ ആള്‍സഞ്ചാരമില്ലാത്ത വഴിയോരങ്ങളില്‍ കൊണ്ടുപോയി ഉപേക്ഷിക്കുന്നത് കാണാം. എന്നാല്‍ അങ്ങനെ ചെയ്യുന്നതിൻ്റെ ഭവിഷ്യത്ത് വളരെ വലുതാണ്. പ്ലാസ്റ്റിക് മണ്ണുമായി ലയിച്ചുചേരാൻ വർഷങ്ങളെടുക്കും. ഇത് പ്രകൃതിക്ക് വളരെയധികം ദോഷകരമാണ്. കൂടാതെ, കൃത്യമായ മാലിന്യ സംസ്കരണം നടത്താതെ തുറന്ന സ്ഥലങ്ങളില്‍ ഉപേക്ഷിച്ചാല്‍ അതില്‍ നിന്നുണ്ടാകുന്ന ബാക്ടീരിയകള്‍ വളരെ അപകടകാരികളാണ്. ഈ ബാക്ടീരിയകള്‍ പടർന്നുപിടിക്കുന്നതിലൂടെ മാരകമായ രോഗങ്ങള്‍ വരാം.
ഡയപ്പറുകള്‍ ഭൂമിക്ക് ഉണ്ടാക്കുന്ന പ്രശ്നത്തെക്കുറിച്ച്‌ കൂടുതല്‍ അവബോധം ലഭിച്ചുതുടങ്ങിയതോടെ പരിസ്ഥിതി സൗഹൃദപരവും, സംസ്കരണം നടത്താൻ സാധിക്കുന്നതുമായ ഡയപ്പറുകള്‍ വിപണിയില്‍ ലഭ്യമായിട്ടുണ്ട്. ഡിസ്പോസിബിള്‍ ആയ സാധാരണ പാമ്ബേഴ്സ് പോലുള്ള ഡയപ്പറുകള്‍ ഒരിക്കലും മൊത്തത്തില്‍ കത്തിക്കരുത്. ഡിസ്പോസിബിള്‍ ഇനത്തില്‍ ധാരാളം രാസവസ്തുക്കള്‍ അടങ്ങിയിട്ടുണ്ട്.
കത്തിക്കുമ്ബോള്‍ ഇവ ഡയോക്സിനുകള്‍ പുറന്തള്ളുന്നു. എത്ര കത്തിക്കാൻ ശ്രമിച്ചാലും ഇവ പൂർണ്ണമായും കത്തുകയില്ല. ഡയപ്പറിനുള്ളിലെ ജെല്ലാണ് ഇതിന് കാരണം. ഉപയോഗിച്ച ഡയപ്പറുകളിലെ മാലിന്യം ആദ്യം നീക്കം ചെയ്യുക. ശേഷം അതിൻ്റെ പാളി കീറി ജെല്‍ ഉപയോഗശൂന്യമായ ഒരു പാത്രത്തില്‍ നിക്ഷേപിക്കുക. ജെല്ലിൻ്റെ അളവിന് അനുസരിച്ച്‌ ഉപ്പ് ചേർക്കുക. അല്പസമയം വെച്ചാല്‍ അത് വെള്ളമായി മാറും. ഈ വെള്ളം പിന്നീട് എവിടെയെങ്കിലും ഒഴിച്ചുകളയാവുന്നതാണ്. ശേഷം ബാക്കിയുള്ള ഡയപ്പർ അവശിഷ്ടങ്ങള്‍ കഴുകി ഉണക്കി കത്തിക്കാവുന്നതാണ്. ഡയപ്പറുകള്‍ ഒരു കാരണവശാലും റീസൈക്കിള്‍ ബിന്നുകളില്‍ നിക്ഷേപിക്കരുത്. കാരണം ഡിസ്പോസിബിള്‍ ഡയപ്പറുകള്‍ റീസൈക്കിള്‍ ചെയ്യാൻ സാധ്യമല്ല.
ഡയപ്പറുകളുടെ ഉള്ളില്‍ ഈർപ്പം നിലനിർത്താൻ സഹായിക്കുന്ന പോളിക്രിലേറ്റ് ക്രിസ്റ്റലുകളെ യൂറോപ്പില്‍ കമ്ബോസ്റ്റ് നിർമ്മിക്കാനായി ഉപയോഗിക്കുന്നു. ഈ മാർഗ്ഗം നമുക്കും പരീക്ഷിക്കാവുന്നതാണ്. എന്നാല്‍ ഭക്ഷണം ഉത്പാദിപ്പിക്കുന്ന വിളകള്‍ക്കോ, ഫലവർഗ്ഗങ്ങള്‍ ഉണ്ടാകുന്ന ചെടികള്‍ക്കോ ഈ കമ്ബോസ്റ്റ് ഉപയോഗിക്കരുത്. പൂച്ചെടികള്‍, മരങ്ങള്‍, പുല്‍ത്തകിടികള്‍ എന്നിവയ്ക്കുള്ള കമ്ബോസ്റ്റ് ആയി ഇവ ഉപയോഗിക്കാവുന്നതാണ്.
