അച്ചാറിൽ വേറിട്ടൊരു രുചിവേണോ? ഇതാ തൊട്ടുകൂട്ടാന് ബീറ്റ്റൂട്ട് – ഈന്തപ്പഴം കോംബിനേഷൻ, രുചിയും ഗുണവും ചേര്ന്ന രുചിക്കൂട്ട്!
എത്ര കറിയുണ്ടെങ്കിലും ചോറിന് അച്ചാർ കൂടിയുണ്ടെങ്കിൽ ഊൺ കുശാലായി. എരിവുള്ള അച്ചാർ ഒന്ന് മാറ്റി നോക്കിയാലോ? ബീറ്റ്റൂട്ട് – ഈന്തപ്പഴം അച്ചാർ കോംബിനേഷൻ പരീക്ഷിക്കാം
ഈന്തപ്പഴത്തിൽ ഉയർന്ന അളവിൽ ഊർജം അടങ്ങിയിട്ടുണ്ട്. ഫ്രക്ടോസ്, ഗ്ലൂക്കോസ് എന്നിങ്ങനെ, ഈ ഊർജത്തിൻ്റെ ഭൂരിഭാഗവും പഞ്ചസാരയുടെ രൂപത്തിലാണെങ്കിലും ധാരാളം നാരുകളും കുറഞ്ഞ ഗ്ലൈസെമിക് സൂചികയും കാരണം, മിതമായ അളവിൽ പ്രമേഹരോഗികൾ പോലും ഇത് സുരക്ഷിതമായി കഴിക്കാം. ഇത് ശരീരഭാരവും രക്തത്തിലെ പഞ്ചസാരയും നിയന്ത്രിക്കാൻ സഹായിക്കും. ഈന്തപ്പഴത്തിന് ഇൻസുലിൻ ഉൽപാദനം വർധിപ്പിക്കാനുള്ള കഴിവുണ്ട്, കൂടാതെ കുടലിൽനിന്ന് ഗ്ലൂക്കോസ് ആഗിരണം ചെയ്യുന്നതിൻ്റെ തോത് കുറയ്ക്കാനും ഈന്തപ്പഴത്തിന് കഴിയുമെന്ന് പഠനങ്ങൾ പറയുന്നു.
ധാരാളം പോഷകഗുണങ്ങൾ അടങ്ങിയ ഒരു പച്ചക്കറിയാണ് ബീറ്റ്റൂട്ട്. ഈന്തപ്പഴവും. എരിവും പുളിയും മധുരവും എല്ലാം കൂടെ ചേര്ന്ന ഈ സ്പെഷല് ബീറ്റ്റൂട്ട് ഈന്തപ്പഴം അച്ചാര് വളരെ എളുപ്പത്തില് തയാറാക്കുകയും ചെയ്യാം.
തയ്യാറാക്കാൻ വേണ്ട ചേരുവകള്
• ബീറ്റ്റൂട്ട് - 300 ഗ്രാം
• ഈന്തപ്പഴം - 20 എണ്ണം
• ചൂടുവെള്ളം - 3/4 കപ്പ്
• വെളുത്തുള്ളി - 1 ബൾബ്
• ഇഞ്ചി - ഒരു ചെറിയ കഷണം
• പച്ചമുളക് - 5 എണ്ണം
• കറിവേപ്പില - 1 തണ്ട്
• വെളിച്ചെണ്ണ/നല്ലെണ്ണ - 3 ടേബിള്സ്പൂൺ
• കടുക് - 1/2 ടീസ്പൂൺ
• മുളകുപൊടി - 1 ടീസ്പൂണ്
• കാശ്മീരി മുളകുപൊടി - 1 ടീസ്പൂണ്
• മഞ്ഞള് പൊടി - ഒരു നുള്ള്
• ഉലുവാപ്പൊടി - 1/4 ടീസ്പൂണ്
• കായം പൊടിച്ചത് - 1/4 ടീസ്പൂണ്
• ഉപ്പ് - ആവശ്യത്തിന്
• വിനാഗിരി - 1/4 മുതല് 1/2 കപ്പ് വരെ
തയാറാക്കുന്ന വിധം
• ഈന്തപ്പഴം കഴുകി കുരുകളഞ്ഞ്, ചൂടുവെള്ളമൊഴിച്ച് ഒരു മണിക്കൂറെങ്കിലും കുതിര്ത്ത് അരച്ചെടുക്കുക.
• വെളുത്തുള്ളിയും ഇഞ്ചിയും തൊലികളഞ്ഞു ചെറുതാക്കി അരിഞ്ഞെടുക്കുക. പച്ചമുളകും കറിവേപ്പിലയും കൂടി അരിഞ്ഞെടുക്കുക.
• ബീറ്റ്റൂട്ട് നന്നായി കഴുകി, തൊലികളഞ്ഞു ചോപ്പ് ചെയ്തെടുക്കുക. (ചീകിയും എടുക്കാം)
• ഒരു ഫ്രൈയിങ് പാന് സ്റ്റൗവില് വച്ച് ചൂടാകുമ്പോള് എണ്ണ ഒഴിച്ചു കടുക് പൊട്ടിക്കണം. ശേഷം ഇതിലേക്കു അരിഞ്ഞുവച്ച വെളുത്തുള്ളിയും ഇഞ്ചിയും പച്ചമുളകും കറിവേപ്പിലയും ചേര്ത്തു നന്നായി വഴറ്റുക.
• ഇനി പൊടികള് ചേര്ത്തു വഴന്നു വരുമ്പോള്, ബീറ്റ്റൂട്ട് ചേര്ത്തു 2-3 മിനിറ്റ് വഴറ്റുക. അതിനുശേഷം അരച്ചു വച്ച ഈന്തപ്പഴവും ഉപ്പും ചേര്ത്തു വഴറ്റുക.
• ഇനി വിനാഗിരി ചേര്ത്തു നന്നായി ഇളക്കി യോജിപ്പിക്കുക. തിളച്ചു കഴിഞ്ഞാല് സ്റ്റൗ ഓഫ് ചെയ്യാം.
• തണുത്തതിനുശേഷം ഗ്ലാസ് ബോട്ടിലിലേക്കു മാറ്റാം. അപ്പോള് തന്നെ ഉപയോഗിച്ച് തുടങ്ങാം.