ആര്‍ത്തവ സമയത്ത് ശാരീരിക വേദനകള്‍, പ്രത്യേകിച്ചും വയറു വേദന എന്നത് സാധാരണയാണ്. എന്നാല്‍ , ചിലര്‍ക്കെങ്കിലും ആര്‍ത്തവ സമയത്ത് അതി കഠിനമായ വയറുവേദയുണ്ടാകുന്നതു കാണാറുണ്ട്. ചിലര്‍ക്കിത് ചിലപ്പോള്‍ പെട്ടെന്നുണ്ടാകുന്നതും ഇതേ രീതിയില്‍ തുടരുന്നതുമായിരിയ്ക്കും. കഠിനമായ ഇത്തരം ആര്‍ത്തവ വേദന, പ്രത്യേകിച്ചും അസാധാരണമായി ഉണ്ടാകുന്നത് നിസാരമായി കണ്ട് തള്ളിക്കളയുന്നത് ആരോഗ്യകരമല്ല. ഇത്തരം കഠിനമായ ആര്‍ത്തവ വേദന പല രോഗങ്ങളുടേയും ലക്ഷണമാകാം.
ഇതിന് ഒരു പ്രധാന കാരണമായി വരാവുന്നത് സ്ത്രീകളുടെ ഗര്‍ഭപാത്രത്തെ ബാധിയ്ക്കുന്ന എന്‍ഡോമെട്രിയോസിസ് എന്നതാണ്. സാധാരണയായി ഗർഭപാത്രത്തിനകത്ത് വളരുന്ന ലൈനിംഗ്, മറ്റ് പ്രത്യുത്പാദന ഭാഗങ്ങളായ ഫാലോപ്യൻ ട്യൂബുകൾ, അണ്ഡാശയങ്ങൾ എന്നിവയിലേക്ക് വളരാൻ തുടങ്ങുമ്പോഴാണ് എൻഡോമെട്രിയോസിസ് സംഭവിക്കുന്നത്. മറ്റ് പ്രത്യുത്പാദന അവയവങ്ങളിൽ വളരുന്ന ലൈനിംഗ് അവയെ ദുർബലപ്പെടുത്തുന്നു, കഠിനമായ വേദനയ്ക്കും രക്തസ്രാവത്തിനുമെല്ലാം ഈ അവസ്ഥ ഇതിന് കാരണമാകുന്നു.
യൂട്രസിലെ ഫൈബ്രോയ്ഡുകള്‍ ഇത്തരത്തില്‍ ആര്‍ത്തവ വേദനയ്ക്കുള്ള കാരണമാണ്. ഇവ കഠിനമായ വേദനയുണ്ടാക്കാം, കടുത്ത ബ്ലീഡിംഗ് കാരണമാകാം. ചിലപ്പോള്‍ ചെറുതും ചിലപ്പോള്‍ വലുതുമായ ഫൈബ്രോയ്ഡുകളുണ്ടാകാം. ഫൈബ്രോയിഡിന്റെ വലുപ്പവും സ്ഥാനവും നിങ്ങളുടെ ഗർഭധാരണത്തെ തടസ്സപ്പെടുത്തിയേക്കാം. ചില സന്ദർഭങ്ങളിൽ, ഒരു സ്ത്രീക്ക് ഫൈബ്രോയിഡുകൾ ഉള്ളപ്പോൾ ഗർഭം ധരിക്കുകയാണെങ്കിൽ, അത് ചിലപ്പോൾ ഗർഭച്ഛിദ്രത്തിലേക്കോ ഗർഭം അലസലിലേക്കോ നയിച്ചേക്കാം.
കോപ്പര്‍ ടി പോലുള്ള ഐയുഡികള്‍ ഇത്തരം കഠിനമായ ആര്‍ത്തവ വേദനയ്ക്ക് കാരണമായേക്കാം. കോപ്പര്‍ ടി പുറപ്പെടുവിയ്ക്കുന്ന കോപ്പര്‍ ഇത്തരം അവസ്ഥയ്ക്കുള്ള കാരണമാണ്. പ്രത്യേകിച്ചും പുതുതായി വയ്ക്കുമ്പോള്‍. ചിലര്‍ക്കിത് സ്ഥിരം വേദനയ്ക്കും ബ്ലീഡിംഗിനും കാരണമാകും. ചിലര്‍ക്ക് കോപ്പര്‍ ടി വച്ച് കുറേക്കാലം വേദനയില്ലാതെ പിന്നീട് പെട്ടെന്ന് ഇത്തരം പ്രശ്‌നങ്ങള്‍ വരികയാണെങ്കില്‍ ഇതിന് മറ്റെന്തെങ്കിലും കാരണങ്ങളുമാകാം. ഇതു പോലെ പെല്‍വിക് ഇന്‍ഫ്‌ളമേറ്ററി രോഗങ്ങളുണ്ടെങ്കിലും ഇത്തരം കഠിനമായ ആര്‍ത്തവ വേദനയുണ്ടാകാം.
അഡിനോമയോസിസ് എന്ന അവസ്ഥയും ഇത്തരം വേദനയ്ക്ക് കാരണമാകാം. ഗര്‍ഭ പാത്രത്തിന്റെ മസിലുകളില്‍ തന്നെ കട്ടി കൂടുന്ന അവസ്ഥയാണിത്. അതായത് എന്‍ഡോമെട്രിയം എന്ന അവസ്ഥയോട് സമാനമായത്. ഗര്‍ഭപാത്ര ഭിത്തിയ്ക്ക് കട്ടി കൂടുന്നതിന് പകരം മസിലുകളില്‍ ഇത്തരം കട്ടി വര്‍ദ്ധിയ്ക്കുന്നു. ഇത് വയറുവേദനയും ബ്ലീഡിംഗും മാത്രമല്ല, സെക്‌സ് സമയത്ത് വേദനയുണ്ടാക്കുന്നു. 30 വയസിന് മേലെയുളള, കുട്ടികളുള്ള സ്ത്രീകള്‍ക്ക് വരാന്‍ സാധ്യതയുള്ള ഒന്നാണ്.
ശ്രദ്ധിക്കുക : അറിവിനെ ജനകീയമാക്കുക എന്ന ലക്ഷ്യം മാത്രമാണ് ഈ പോസ്റ്റിന് ഉള്ളത്.രോഗനിർണ്ണയത്തിനും ചികിത്സയ്ക്കും പകരമാകാൻ ഉദ്ദേശിച്ചുള്ളതല്ല, കൃതഹസ്തരായ ചികിത്സകരുടെ ഉപദേശപ്രകാരം മാത്രം ഔഷധങ്ങൾ ഉപയോഗിക്കുക
കൂടുതൽ പഠനം നടത്തി നല്ലത് മാത്രം സ്വീകരിക്കുക🙏🏻.
🄰🅁🄸🅅 🄰🅁🄾🄶🅈🄰🄼