പെൺ മക്കളോടു അമ്മ പറഞ്ഞു കൊടുക്കേണ്ട ചില പ്രധാനപ്പെട്ട കാര്യങ്ങൾ?.

പെൺ മക്കളോടു അമ്മ പറഞ്ഞു കൊടുക്കേണ്ട ചില കാര്യങ്ങൾ?.

പെൺമക്കൾക്ക് അമ്മമാർ പറഞ്ഞു കൊടുക്കേണ്ട ഒരുപാടു കാര്യങ്ങളുണ്ട്. മടിയും ചമ്മലും കാരണം അമ്മമാർ ചില കാര്യങ്ങൾ മനപൂർവം പറയാറില്ല. അമ്മമാർ പെൺ മക്കളോടു പറയുന്നത് ഉചിതമെന്നു കണ്ട ചില കാര്യങ്ങൾ സൂചിപ്പിക്കുന്നു.

പെൺകുട്ടിയായി ജനിച്ചതിൽ അഭിമാനിക്കുവാൻ മകൾക്കു കഴിയണം. അടുത്ത ജന്മത്തിലെങ്കിലും ഒരു ആണായി ജനിക്കണമെന്ന് ആഗ്രഹിക്കുന്നവരാണ് ഭൂരിഭാഗം പെൺകുട്ടികളും. എന്നാൽ പെൺകുട്ടിയായി ജനിച്ചതിൽ സന്തോഷിക്കുന്നവരാകണം. പെൺകുട്ടിയായിരുന്നുകൊണ്ടു തന്നെ ജീവിതത്തിൽ പുരുഷനേക്കാളു പരി ഉന്നതിയിലെത്തണം. ആ വിജയം ആഘോഷിക്കണം. സ്വതന്ത്ര്യത്തോടെ ഇഷ്ടമുള്ള കാര്യങ്ങൾ ചെയ്ത് ലോകത്തോട് ഉറക്കെ പറയണം ഒരു പെൺകുട്ടിയായിരിക്കുന്നതിൽ അഭിമാനിക്കുന്നുവെന്ന് .

കഴിയുന്നത്ര പ്രായോഗിക അറിവ് നേടുവാൻ പ്രോത്സാഹിപ്പിക്കണം.

സ്കൂളിലും കോളേജിൽ നിന്നും ലഭിക്കുന്ന അക്കാദമിക് അറിവുകൾക്കുപരി മകൾക് സ്വയം അറിയുവാനും, ചുറ്റുപാടുകളെ മനസ്സിലാക്കാനും കഴിയണം. നല്ല ശീലങ്ങളും സ്വായത്വമാക്കുന്ന സ്വഭാവം വളർത്തിയെടുക്കണം.

 

ഓരോ കുഞ്ഞു കാര്യത്തിൽ നിന്നും അറിവു നേടുക. ജീവിതത്തിലെ ഓരോ നിമിഷത്തിലും അറിവു സമ്പാദിക്കുക. ഇതെന്നെക്കൊണ്ടു പറ്റില്ല, എനിക്കിതിനു കഴിയില്ല എന്നീ വാക്കുകൾ ഒരിക്കലും ജീവിതത്തിൽ പറയാനിടവരരുതെന്നും മകളെ ബോദ്ധ്യപ്പെടുത്തണം.കഴിയുന്നിടത്തോളം കാര്യങ്ങൾ സ്വന്തം കാലിൽ നിന്നു ചെയ്യുക, അറിയാത്ത കാര്യങ്ങൾ മറ്റുള്ളവരോട് ചോദിച്ചു മനസ്സിലാക്കുവാനും കഴിയണം.

സുഹൃത്തുക്കളെ ബുദ്ധിപൂർവം തിരഞ്ഞെടുക്കണം. തന്നെ നന്നായി മനസിലാക്കാൻ കഴിയുന്ന വിശ്വസ്തരായവരെ മാത്രം സുഹൃത്തുക്കളാക്കുക. നല്ല ഒന്നോ രണ്ടോ അടുത്ത സുഹൃത്തുക്കളായാലും മതി. എന്തും ഏതും ആരോടും പറയാനും ചർച്ച ചെയ്യാനുമുള്ള ആർജ്ജവം ഉണ്ടാകണം.

പറ്റില്ല എന്നു പറയാൻ പഠിക്കുക. NO പറയാൻ കഴിഞ്ഞാൽ പല പ്രശ്നങ്ങളും ഒഴിവാകും.

ഈ ലോകത്തുള്ള എല്ലാവരെയും സന്തോഷിപ്പിച്ച് ജീവിക്കാമെന്നു കരുതരുത്. അത് ശുദ്ധമണ്ടത്തരമാണ്. പൂർണബോധ്യമുള്ള കാര്യങ്ങൾ മാത്രം ചെയ്യുക.

മോശം എന്നു തോന്നുന്ന കാര്യങ്ങൾക്ക് മറ്റുള്ളവർ നിർബന്ധിച്ചാൽ അവരോട് പറ്റില്ല എന്നു പറയാൻ ശ്രദ്ധിക്കുക. ശക്തമായും എന്നാൽ മാന്യമായും NO പറയാൻ ശീലിപ്പിക്കണം. ധാർഷട്യത്തോടെയുള്ള പ്രതികരണം ശത്രുക്കളെ സൃഷ്ടിക്കുമെന്നും പറഞ്ഞു കൊടുക്കണം.

പ്രായോഗിക ബുദ്ധി ഉപയോഗിക്കുക.

പ്രായോഗികമായി ചിന്തിച്ച് തീരുമാനമെടുത്താൽ ജീവിതത്തിലെ അബദ്ധങ്ങളിൽ ചെന്നു ചാടാതെ സൂക്ഷിക്കാം. ഗൗരവമുള്ള കാര്യങ്ങളിൽ പെട്ടന്നു തീരുമാനമെടുക്കാതെ സാവധാനം ആലോചിച്ച് പ്രായോഗികമായ തീരുമാനങ്ങളെടുക്കുക. വേണമെങ്കിൽ മാത്രം അറിവുള്ള മുതിർന്നവരുടെ ഉപദേശം സ്വീകരിക്കുക. ദൈവം നൽകിയ ബുദ്ധിയുപയോഗിച്ച് തീരുമാനങ്ങളെടുക്കാമെന്നും പറയണം.

പ്രണയഭാവം ഈ പ്രായത്തിന്റെ പ്രത്യേകതയാണ്. സമയവും സന്ദർഭവും നോക്കി നല്ലവരോടു മാത്രമാകണം. പ്രണയം മനോഹരമായ ഒരു വികാരമാണ്. ഏതു നിമിഷവും ആരോടും പ്രണയം തോന്നാം. പക്ഷെ കൃത്യമായ സമയവും സന്ദർഭവും ഉചിതമായ പങ്കാളിയേയും കിട്ടുമ്പോൾ മാത്രമേ പ്രണയം പൂർണമാവു എന്നു ധരിപ്പിക്കുക. അങ്ങനെയല്ലാതെ വരുമ്പോഴാണ് പ്രണയങ്ങൾ ദുരന്തങ്ങളാവുന്നത്. "നിന്നെ അറിയുന്ന, നിനക്ക് അറിയുന്ന, ജീവിതത്തിലുട നീളം ഒത്തുപോകുമെന്ന് നിനക്ക് പൂർണ്ണബോധ്യമുള്ള, ഒരാളെ മാത്രം പ്രണയിക്കുക. അയാളോട് നൂറു ശതമാനം സത്യസന്ധത പുലർത്തുക" ഇതായിരിക്കണം പ്രണയത്തിലേക്കു നീങ്ങുന്ന മകളോടു പറയേണ്ടത്.

പ്രണയം, വിശ്വസ്ത‌ത, പരസ്പര ധാരണ ഇതൊക്കയാണ് ഒരു ബന്ധം ഊഷ്മളാക്കി നിലനിർത്തുന്നത്. അതുകൊണ്ട് പരസ്പരം പഴിചാരാതെ, ഭരിക്കാതെ പങ്കാളിയെയും തുല്യരായി പരിഗണിക്കാനുള്ള ഒരു മനസുണ്ടാവണം. എന്നു കരുതി സ്വന്തം അസ്തിത്വം പണയം വെയ്ക്കരുത്. പരസ്പരം ബഹുമാനിച്ചും അംഗീകരിച്ചും മുന്നോട്ടു പോവുക. പ്രണയിച്ച ശേഷം പിരിഞ്ഞാലും നഷ്ടബോധവും കുറ്റബോധവും തോന്നാതെയുമിരിക്കണം.

വിവാഹം എപ്പോൾ വേണമെന്ന് സ്വയം തീരുമാനിക്കാം. അതിനു മുൻപ് വിവാഹത്തിനു സജ്ജമായോ എന്നും സ്വയം വിലയിരുത്തണം. വിവാഹത്തിനു മുമ്പ് സ്വന്തം കാലിൽ നിൽക്കാനുള്ള കഴിവോ, ജോലിയോ സ്വായത്തകമാക്കുകയും വേണം.

ആരെ വിവാഹ കഴിക്കണമെന്നത് പെൺകുട്ടിയുടെ അവസാന തീരുമാനമാണ്. ഞങ്ങൾ നിർബന്ധിച്ചാൽ പോലും നീ വിവാഹത്തിന് തയാറാവരുത്. നിൻെറ മനസ് എപ്പോൾ ഒരു പങ്കാളിയെ ആഗ്രഹിക്കുന്നുവോ ആ നിമിഷമല്ലാതെ വിവാഹത്തെക്കുറിച്ച് നീ ചിന്തിക്കരുത്. അച്ഛൻെറയും അമ്മയുടെയും കടമനിർവഹിക്കാ‌നോ ഭാരമിറക്കിവെയ്ക്കാനോ സഹോദരങ്ങൾക്ക് നേരത്തെ വിവാഹം കഴിക്കുന്നതിനോ ഒന്നും നീ നിൻെറ ജീവിതത്തെ ബലികഴിക്കരുത്. കാരണം ആ ഒരു ദിവസംകൊണ്ട് ഞങ്ങളുടെ ഉത്തരവാദിത്തം കഴിഞ്ഞു. പിന്നീടുള്ള ഓരോ ദിവസവും ജീവിച്ചു തീർക്കേണ്ടത് നീ മാത്രമാണ്. അതുകൊണ്ട് ഒന്നിനുവേണ്ടിയും ആർക്കുവേണ്ടിയും നീ ധൃതി പിടിച്ച് വിവാഹിതയാവരുത്. മനസുകൊണ്ടും ശരീരംകൊണ്ടും ഒരു പങ്കാളി വേണമെന്നു തോന്നുമ്പോൾ മാത്രം നിനക്ക് ഇണങ്ങുന്ന ഒരാളെ മാത്രം നീ പങ്കാളിയാക്കുക. അതിന് ഞങ്ങളുടെ പൂർണ്ണ പിന്തുണ നിനക്കുണ്ടാവും.

വിവാഹം കഴിയുന്നതോടെ ചിലപ്പോഴൊക്കെ നിൻെറ താല്പര്യങ്ങളിൽ ചില്ലറ വ്യത്യാസങ്ങൾ വരുത്തേണ്ടി വരും. മാതാപിതാക്കളെ സ്നേഹിക്കുന്നതുപോലെ നീ പങ്കാളിയുടെ മാതാപിതാക്കളെയും സ്നേഹിക്കണം. ജീവിതത്തിൽ ചില അടിയന്തിര സന്ദർഭങ്ങളുണ്ടാവുമ്പോൾ ചിലപ്പോൾ നിനക്ക് രണ്ടു കൂട്ടരോടും ഒരുപോലെ നീതിപുലർത്താൻ പറ്റിയെന്നു വരില്ല. അങ്ങനെയുള്ള സന്ദർഭങ്ങളിൽ പ്രായോഗിക ബുദ്ധി ഉപയോഗിക്കണം. ഇപ്പോൾ നിൻെറ സ്നേഹവും സഹകരണവും ആർക്കാണോ വേണ്ടതെന്ന്തിരിച്ചറിഞ്ഞ് അവർക്കൊപ്പം നിൽക്കുക. ഉത്തരവാദിത്തങ്ങളിൽ നിന്ന് ഒരിക്കലും ഒളിച്ചോടാതിരിക്കുക.

സന്ധിചെയ്യാം, ത്യാഗം ചെയ്യാം അത് അർഹിക്കുന്നവർക്കുവേണ്ടി മാത്രം

ജീവിതത്തിൽ നിരവധിയവസരങ്ങളിൽ സന്ധി ചെയ്യേണ്ടി വരാം. ചിലപ്പോൾ ത്യാഗം ചെയ്യേണ്ടി വരാം. പക്ഷെ അതൊക്കെ അർഹിക്കുന്നവർക്കുവേണ്ടി മാത്രം ചെയ്യുക. നിന്നിലെ പെണ്ണിനെ ബഹുമാനിക്കാത്തവർക്കുവേണ്ടി ജീവിതം പാഴാക്കാതിരിക്കുക. സ്വന്തം അസ്തിത്വത്തേക്കാൾ വലുതല്ല ഒന്നും എന്ന് തിരിച്ചറിയുക. 

മറ്റുള്ളവർക്ക് ഭാരമാകുമെന്ന തോന്നൽ ഉണ്ടാവാതെ മനസിനെ എന്നും സന്തോഷത്തോടെ നിലനിർത്തുക.

അവസാനമായി ഞങ്ങൾ എന്തിനും കൂടെയുണ്ടെന്നും

നീ നേരിടുന്ന എന്തു പ്രശ്നത്തെക്കുറിച്ചും ഞങ്ങളോടു തുറന്നു പറയാമെന്നും അറിയിക്കണം. അതൊരു മോശം കാര്യമാവാം നല്ലകാര്യമാകാം. എന്തു പ്രശ്നമായാലും നമുക്കത് ഒരുമിച്ചു നേരിടാം. ജീവിതത്തിൽ വിജയവും പരാജയവും ഉണ്ടായേക്കാം. അതിനെയൊക്കെ തൻറേടത്തോടെ നേരിട്ട് സ്വന്തം കാലിൽ നിൽക്കാൻ പഠിക്കുക. ഞങ്ങളുടെ സ്നേഹവും അനുഗ്രഹവും എപ്പോഴും നിന്റെ കൂടെയുണ്ടാവുമെന്നും മകളെ പറഞ്ഞു ബോദ്ധ്യപ്പെടുത്തുക. ഇങ്ങനെയുള്ള നിർദ്ദേശം നിങ്ങളുടെ മകൾക്കു ഇഷ്ടമാകുമെന്നു വിശ്വസിക്കുകയാണ്.

KHAN KARICODE

CON PSYCHOLOGIST