സ്ത്രീകൾക്ക് ഗർഭകാലത്ത് ചില ഭക്ഷണങ്ങളോട് ഒരു കൊതിയുണ്ടാവുക വളരെ സാധാരണമായ കാര്യമായാണ് കണക്കാക്കാറുള്ളത്.
എരിവും പുളിയും മുതല്‍ മധുരത്തോടും വറുത്ത ഭക്ഷണങ്ങളോടും വരെ അത്തരത്തില്‍ ഒരു ആസക്തിയുണ്ടാകാം. ചിലപ്പോള്‍ ഇതുവരെ ഭക്ഷണക്രമത്തിന്‍റെ ഭാഗമല്ലാത്തവയോട് വരെ ഗർഭിണികള്‍ക്ക് ആസക്തിയുണ്ടാകാറുണ്ട്. ഇതിന്റെ കാരണമെന്താണെന്ന് അറിയാമോ?
ഹോർമോണ് വ്യതിയാനങ്ങള്‍, പോഷകക്കുറവ്, സമ്മർദ്ദം പോലെ ഗർഭകാലത്തുണ്ടാകുന്ന വൈകാരിക ഘടകങ്ങള്‍ എന്നിങ്ങനെ മൂന്ന് പ്രധാനപ്പെട്ട കാരണങ്ങളാണ് വിദഗ്ധർ ചൂണ്ടിക്കാണിക്കുന്നത്. അതേസമയം ഗർഭകാലത്തെ ഈ ആസക്തി കുഞ്ഞിന്റെ വളർച്ചയ്ക്കോ ആരോഗ്യകരമായ ഗർഭധാരണത്തിനോ ആവശ്യമാണെന്ന് ഇതുവരെ പഠനങ്ങള്‍ സ്ഥിരീകരിച്ചിട്ടില്ല. എന്നാല്‍ ഗർഭിണികള്‍ക്ക് ആസക്തിയുണ്ടാക്കുന്ന മിക്ക ഭക്ഷണങ്ങളും പോഷകഗുണമില്ലാത്തതായിരിക്കുമെന്നും വിദഗ്ധർ പറയുന്നു.
സാധാരണഗതിയില്‍ ഗർഭിണിയായിരിക്കുമ്ബോള്‍ നാല് അല്ലെങ്കില്‍ ആറാം ആഴ്ച മുതല്‍ പ്രസവം വരെ ഭക്ഷണത്തോടുള്ള കൊതി തുടരാം. ഗർഭകാലത്തെ 13 മുതല്‍ 27 ആഴ്ച വരെയുള്ള സമയത്താണ് ഗർഭിണികളില്‍ ഇത്തരത്തില്‍ ഭക്ഷണത്തോടുള്ള ആസക്തി ഏറ്റവും കൂടുതല്‍ കണ്ടുവരുന്നത്.
പോഷകക്കുറവ്
കൂടാതെ, ശരീരത്തില്‍ ഇരുമ്ബ് അല്ലെങ്കില്‍ കാല്‍സ്യം പോലുള്ള പോഷകങ്ങളുടെ കുറവും ഗർഭിണികളില്‍ ഭക്ഷണത്തോടുള്ള ആസക്തിയുണ്ടാക്കാം. പോഷകക്കുറവിനെ തുടർന്ന് ചിലർക്ക് ഭക്ഷണത്തിന് പുറമേ ചോക്ക്, പേപ്പർ പോലുള്ള ഭക്ഷണേതര വസ്തുക്കളോടും കൊതിയുണ്ടാകാം. ഇതിനെ പിക്ക എന്ന് വിളിക്കുന്നു.
ഹോർമോണ് വ്യതിയാനം
ഗർഭാവസ്ഥയില്‍ ശരീരത്തിലെ ഹോർമോണുകള്‍ക്ക് വലിയ തോതിലുള്ള ഏറ്റക്കുറച്ചിലുകള്‍ സംഭവിക്കാറുണ്ട്. പ്രത്യേകിച്ച്‌ ഈസ്ട്രജൻ, പ്രൊജസ്റ്ററോണ്‍ ഹോർമോണുകളുടെ അളവില്‍. ഇത് രുചിയുടെയും മണത്തിന്‍റെയും ഇന്ദ്രിയങ്ങളെ ബാധിക്കുകയും ചില ഭക്ഷണങ്ങളോട് ആസക്തി ഉണ്ടാക്കുകയും ചെയ്യുന്നു.
വൈകാരിക ഘടകങ്ങള്‍
സമ്മർദം പോലുള്ള വൈകാരിക ഘടകങ്ങളും ചിലർക്ക് ഭക്ഷണത്തോട് ആസക്തിയുണ്ടാക്കാം. ഗര്‍ഭാവസ്ഥയില്‍ കുടുംബം, ജോലി എന്നിവയെ തുടര്‍ന്നുണ്ടാകുന്ന സമ്മര്‍ദം പലപ്പോഴും ഭക്ഷണത്തോടുള്ള ആസക്തി കൂട്ടിയേക്കാം. ഗർഭാവസ്ഥയില്‍ ആയിരിക്കുമ്ബോള്‍ അവരുടെ സന്തോഷം നിലനിർത്താൻ മറ്റുള്ളവരെ ആശ്രയിക്കുന്നതിന് പകരം സ്വന്തം വൈകാരിക ശക്തി വളർത്തിയെടുക്കുന്നതില്‍ ശ്രദ്ധ കേന്ദ്രീകരിക്കണം.
ഗര്‍ഭാവസ്ഥയില്‍ ആഗ്രഹം തോന്നുന്ന ഭക്ഷണങ്ങള്‍ കഴിക്കുന്നതില്‍ തെറ്റില്ല, എന്നാല്‍ പോഷകസമൃദ്ധമായ ഭക്ഷണത്തിന്‍റെ ആവശ്യകതയെ അനാരോഗ്യകരമായ ആസക്തികള്‍കൊണ്ട് കീഴടക്കാന്‍ പാടില്ല. ആരോഗ്യകരമല്ലാത്ത ഭക്ഷണത്തോടുള്ള ആസക്തി ശ്രദ്ധപൂര്‍വം മിതപ്പെടുത്താം.
ഭക്ഷണത്തോടുള്ള ആസക്തി എങ്ങനെ കൈകാര്യം ചെയ്യാം എന്ന് നോക്കാം
പോഷകാഹാരം നിലനിർത്തുക:
ആസക്തിയുടെ തീവ്രത കുറയ്ക്കാൻ സമീകൃതവും പോഷകങ്ങള്‍ അടങ്ങിയതുമായ ഭക്ഷണം ഡയറ്റില്‍ കൃത്യമായും തുടര്‍ച്ചയായും ഉള്‍പ്പെടുത്തുക.
ആരോഗ്യകരമായ മറ്റ്മാർഗങ്ങള്‍:
മധുരമുള്ളതോ കൊഴുപ്പടങ്ങിയതോ ആയ ഭക്ഷണങ്ങള്‍ കഴിക്കാൻ ആഗ്രഹമുണ്ടാകുമ്ബോള്‍ പഴങ്ങള്‍, മുഴുവൻ ധാന്യ ലഘുഭക്ഷണങ്ങള്‍ പോലുള്ള ആരോഗ്യകരമായ ഭക്ഷണക്രമങ്ങള്‍ ഉള്‍പ്പെടുത്താം.
മനസുനിറഞ്ഞു ഭക്ഷണം കഴിക്കാം:
സമ്മര്‍ദത്തെ തുടര്‍ന്ന് ഭക്ഷണം കഴിക്കുന്നത് ഒഴിവാക്കാന്‍ മനസു നിറഞ്ഞു ഭക്ഷണം കഴിക്കുന്നത് ശീലിക്കാം. ഇത് ഭക്ഷണത്തെ ഇഷ്ടപ്പെടാനും അമിതമായി കഴിക്കുന്നത് ഒഴിവാക്കാനും സഹായിക്കും.
ആവശ്യത്തിന് വെള്ളം കുടിക്കുക:
നിര്‍ജ്ജലീകരണത്തെയും വിശപ്പായി തെറ്റുദ്ധരിക്കാം. അതിനാല്‍ വെള്ളം ആവശ്യത്തിന് കുടിക്കാന്‍ ശ്രദ്ധിക്കുക.
ശ്രദ്ധിക്കുക : അറിവിനെ ജനകീയമാക്കുക എന്ന ലക്ഷ്യം മാത്രമാണ് ഈ പോസ്റ്റിന് ഉള്ളത്.രോഗനിർണ്ണയത്തിനും ചികിത്സയ്ക്കും പകരമാകാൻ ഉദ്ദേശിച്ചുള്ളതല്ല, കൃതഹസ്തരായ ചികിത്സകരുടെ ഉപദേശപ്രകാരം മാത്രം ഔഷധങ്ങൾ ഉപയോഗിക്കുക. കൂടുതൽ പഠനം നടത്തി നല്ലത് മാത്രം സ്വീകരിക്കുക.ആരോഗ്യവിദഗ്ധന്റെയോ ന്യൂട്രീഷനിസ്റ്റിന്റെയോ ഉപദേശം തേടിയശേഷം മാത്രം ആഹാരക്രമത്തില്‍ മാറ്റം വരുത്തുക.