പ്രത്യേകിച്ച് ജിമ്മിലും മറ്റും പോയി കഠിനമായ വ്യായാമം ആരംഭിക്കുന്നതിന് മുമ്ബ് വിദഗ്ധാഭിപ്രായം തേടുകയും വേണ്ട പരിശോധനകള്‍ നടത്തുകയും ചെയ്യേണ്ടതാണ്. അടുത്തിടെ ജിമ്മില്‍ വർക്കൗട്ട് ചെയ്യുന്നതിനിടെയുണ്ടായ ഹൃദയാഘാത മരണങ്ങളില്‍ പലതിനുംപിന്നില്‍ തിരിച്ചറിയപ്പെടാതെ പോകുന്ന ഹൃദ്രോഗപ്രശ്നങ്ങള്‍ ആണെന്നാണ് വിദഗ്ധർ പറയുന്നത്. ഈയടുത്താണ് ഹിമാചല്‍പ്രദേശില്‍ നിന്നുള്ള ഒരു മുപ്പത്തിയഞ്ചുകാരൻ വർക്കൗട്ടിനിടെ ഹൃദയാഘാതമുണ്ടായി മരിച്ചത്. കഠിന വ്യായാമം ഹൃദയസ്തംഭനത്തിന് കാരണമാകുമെന്ന് ഡോ. ദീപക് കൃഷ്ണമൂർത്തി എക്സില്‍ കുറിക്കുന്നു.
അമിതമായി വ്യായാമം ചെയ്യുന്നതിനെ ഓവർട്രെയിനിങ് സിൻഡ്രോം എന്നാണ് പറയുന്നത്. അതികഠിനമായ വ്യായാമങ്ങളില്‍ മുഴുകുകയും അതില്‍ നിന്ന് ഒരു വീണ്ടെടുപ്പ് നടത്താൻ ശരീരത്തെ അനുവദിക്കാതെ വീണ്ടും വ്യായാമത്തിലേക്ക് തന്നെ തിരികെപ്പോവുകയും ചെയ്യുന്നതിനെയാണ് ഓവർട്രെയിനിങ് സിൻഡ്രോം എന്നുപറയുന്നത്. ഇത് ശാരീരികവും മാനസികവുമായ ഒട്ടേറെ പ്രശ്നങ്ങള്‍ക്ക് കാരണമാകും. ശരീരത്തിന് ബുദ്ധിമുട്ടും വീക്കവും ഉണ്ടാക്കുന്നതോടൊപ്പം ഹോർമോണ്‍ അസന്തുലിതാവസ്ഥയ്ക്കും ഇത് കാരണമാകും. ഹോർമോണ്‍ അസന്തുലിതാവസ്ഥ പിന്നീട് പേശീഭാരം കുറയ്ക്കുകയും ശരീരത്തിലെ കൊഴുപ്പ് കൂട്ടുകയും ചെയ്യും. അതിനാല്‍, വ്യായാമം ചെയ്യുമ്ബോള്‍ അതിന്റെ ദൈർഘ്യം, തീവ്രത, എണ്ണം എന്നിവ ശ്രദ്ധിക്കുന്നത് വളരെ പ്രധാനമാണ്.
നിങ്ങള്‍ക്ക് ഓവർട്രെയിനിങ് സിൻഡ്രോം ഉണ്ടോയെന്ന് തിരിച്ചറിയാൻ താഴെപ്പറയുന്ന ലക്ഷണങ്ങള്‍ പരിശോധിക്കൂ:
നിരന്തരമായ ക്ഷീണമാണ് ആദ്യത്തെ ലക്ഷണം. വ്യായാമത്തിനിടയില്‍ ശരീരത്തിന് വിശ്രമിക്കാനുള്ള സമയം ലഭിക്കാതിരിക്കുമ്ബോഴാണ് ക്ഷീണമുണ്ടാകുന്നത്. ഉറങ്ങാനുള്ള പ്രയാസമാണ് മറ്റൊന്ന്. അമിതമായി വ്യായാമം ചെയ്യുമ്ബോള്‍ ഹൃദയമിടിപ്പ് കൂടുകയും ഇത് അഡ്രിനാലിൻ ഉത്പാദനം കൂട്ടുകയും ചെയ്യും. ഇങ്ങനെ ശരീരത്തിന് റിലാക്സ് ചെയ്യാൻ പറ്റാതെ വരികയും ഉറക്കമില്ലായ്മയിലേക്ക് നയിക്കുകയും ചെയ്യുന്നു.
അടിക്കടി പേശികള്‍ക്കും സന്ധികള്‍ക്കുമുണ്ടാകുന്ന മുറിവും ഓവർട്രെയിനിങ് സിൻഡ്രോമിന്റെ ഭാഗമായുള്ളതാവാം. ഇത് ശരീരത്തിന് സ്ഥിരമായ വീക്കവുമുണ്ടാക്കും. വിശപ്പില്ലായ്മയാണ് മറ്റൊന്ന്. വ്യായാമം കൂടുമ്ബോള്‍ ശരീരത്തിന്റെ മെറ്റബോളിസം വേഗത്തിലാവുകയും ഇത് വിശപ്പ് കുറയ്ക്കുകയും ചെയ്യും. കൂടാതെ, ചില പ്രത്യേക ഭക്ഷണത്തോടുള്ള ആഗ്രഹവും കൂടും. ഇത് അസാധാരണമായ ഭക്ഷണക്രമത്തിലേക്ക് നയിക്കും.
മാനസികസമ്മർദങ്ങളെ ചെറുക്കാൻ വ്യായാമം സഹായിക്കുമെങ്കിലും അമിതമായ വ്യായാമം ഒരു വ്യക്തിയെ ഉത്കണ്ഠാകുലനും വികാരനിർഭരനുമാക്കും. വിഷാദം പോലെയുള്ള ദീർഘകാല അസുഖങ്ങളിലേക്കും ഇത് നയിക്കും. സ്ത്രീകളില്‍ ഇത് ആർത്തവചക്രത്തിന്റെ താളം തെറ്റിക്കുകയും ചെയ്യാം. ഇത് പിന്നീട് ബോണ്‍ ഡെൻസിറ്റി സംബന്ധമായ പ്രശ്നങ്ങള്‍, ഫെർട്ടിലിറ്റി പ്രശ്നങ്ങള്‍ എന്നിവയിലേക്കും നയിക്കാം.
രോഗപ്രതിരോധശേഷി കുറയ്ക്കുക, പേശികളുടെ വളർച്ച കുറയുക എന്നിവയാണ് ഓവർട്രെയിനിങ് സിൻഡ്രോമിന്റെ മറ്റുചില ലക്ഷണങ്ങള്‍. കൂടാതെ, തങ്ങളുടെ ശരീരവും അതിന്റെ ഫിറ്റ്നെസുമായി ഭ്രാന്തമായ അഭിനിവേശവുമുണ്ടാവും ഇത്തരക്കാർക്ക്. എത്ര വ്യായാമം ചെയ്താലും മതിയാവില്ല എന്ന തോന്നലും ഉണ്ടാകും.
വ്യായാമം ആരംഭിക്കും മുമ്ബ് ശ്രദ്ധിക്കേണ്ട ചില കാര്യങ്ങള്‍
- ഹൃദയത്തിന്റെയും മസ്തിഷ്കത്തിന്റെയുമൊക്കെ ചില പ്രശ്നങ്ങള്‍ ലക്ഷണങ്ങളൊന്നും കാണിക്കാതെ തന്നെ നമുക്കുണ്ടായേക്കാം. ഡോക്ടറുടെ, വിദഗ്ധപരിശീലകരുടെ നിർദേശത്തോടെയാവാം വ്യായാമങ്ങള്‍.
- എല്ലാവരുടേയും ശരീരം ഒരുപോലെയല്ല. ഒന്നും ചെയ്യാതെയിരുന്ന് പെട്ടന്നൊരു ദിവസം കഠിനവ്യായാമത്തിലേക്ക് കടക്കുന്നത് അനാരോഗ്യം ഉണ്ടാക്കിയേക്കും. മാനസികമായുള്ള തയ്യാറെടുപ്പും ഇതിന് പ്രധാനമാണ്.
- ഏതുതരം വ്യായാമമാണെങ്കിലും പതിയെ ചെയ്യാൻ തുടങ്ങാം. നടത്തം, ഓട്ടം, നീന്തല്‍, വിവിധതരം കളികള്‍, ജിമ്മിലെ വ്യായാമങ്ങള്‍ തുടങ്ങിയവയെല്ലാം ഘട്ടംഘട്ടമായി ചെയ്യാം.
- മാംസപേശികളെയും സന്ധികളെയും ചെറിയ വ്യായാമത്തിലൂടെ ശക്തിപ്പെടുത്തിക്കൊണ്ടുവരികയാണ് ആദ്യം വേണ്ടത്.
- ജിമ്മിലാണെങ്കില്‍ ശരീരത്തെ ചെറിയ വ്യായാമങ്ങളിലൂടെ ഒരുക്കിയെടുത്ത ശേഷമേ സൈക്കിള്‍, ട്രെഡ് മില്‍ തുടങ്ങിയവയിലേക്ക് കടക്കാവൂ.
- രക്തസമ്മർദം, ഹൃദയസംബന്ധമായ പ്രശ്നങ്ങള്‍ തുടങ്ങിയവ ചിലർക്ക് ഉണ്ടാകാം. സ്ത്രീകളിലാണെങ്കില്‍ കൂടുതലായി ഫൈബ്രോയിഡ്, പി.സി.ഒ.ഡി., തൈറോയിഡ് പ്രശ്നം ഒക്കെയുണ്ട്. ഡോക്ടറോടോ ട്രെയിനറോടോ ഫിസിയോതെറാപ്പിസ്റ്റിനോടോ സംസാരിച്ചശേഷം അനുയോജ്യമായ വ്യായാമത്തിലേക്ക് കടക്കാം.
- വ്യായാമത്തിന് മുൻപ് വാം അപ് നിർബന്ധമാണ്. കൈകാലുകള്‍ക്ക് സ്ട്രെച്ചിങ് നല്‍കണം. അഞ്ചുമിനിറ്റ് വാംഅപ് ചെയ്തേശഷം വ്യായാമത്തിലേക്ക് കടക്കാം.
- വർക്ക്‌ഔട്ടിന് മുൻപ് പ്രീവർക്ക് ഔട്ട് മീല്‍സ് കഴിക്കാം. മധുരമില്ലാത്ത പഴമോ ജ്യൂസോ മതിയാകും.
- ആദ്യഘട്ടത്തില്‍ ശരീരത്തെ വഴക്കമുള്ളതാക്കുന്ന വ്യായാമങ്ങളാണ് ചെയ്യേണ്ടത്. തുടർന്ന് ശരീരഭാരം കുറയ്ക്കുന്ന തീവ്രതയേറിയ വ്യായാമങ്ങള്‍ ചെയ്തുതുടങ്ങാം.
- അമിതഭാരമുള്ളവർ ഒരു പേഴ്സണല്‍ ട്രെയിനറുടെ കീഴില്‍ പരിശീലനം ചെയ്യുന്നതാണ് നല്ലത്. വർക്ക്‌ഔട്ട്, ഭക്ഷണം എന്നിവയെക്കുറിച്ച്‌ കൃത്യമായ നിർദേശം ലഭിക്കാൻ അത് നല്ലതാണ്.
- വ്യായാമത്തിനിടെ ക്ഷീണം തോന്നിയാല്‍ വിശ്രമിക്കുകയും ദാഹിക്കുമ്ബോള്‍ ആവശ്യത്തിന് വെള്ളംകുടിക്കുകയും വേണം.
ശ്രദ്ധിക്കുക : അറിവിനെ ജനകീയമാക്കുക എന്ന ലക്ഷ്യം മാത്രമാണ് ഈ പോസ്റ്റിന് ഉള്ളത്.രോഗനിർണ്ണയത്തിനും ചികിത്സയ്ക്കും പകരമാകാൻ ഉദ്ദേശിച്ചുള്ളതല്ല, കൃതഹസ്തരായ ചികിത്സകരുടെ ഉപദേശപ്രകാരം മാത്രം ഔഷധങ്ങൾ ഉപയോഗിക്കുക. കൂടുതൽ പഠനം നടത്തി നല്ലത് മാത്രം സ്വീകരിക്കുക.ആരോഗ്യവിദഗ്ധന്റെയോ ന്യൂട്രീഷനിസ്റ്റിന്റെയോ ഉപദേശം തേടിയശേഷം മാത്രം ആഹാരക്രമത്തില്‍ മാറ്റം വരുത്തുക.
