ചിലയാളുകൾക്ക് മാനസിക സമ്മർദ്ദം കൂടിയാൽ വയറു ചാടാൻ സാധ്യതയുണ്ടെന്ന് പഠനങ്ങൾ
മാനസിക സമ്മർദ്ദം കൂടുമ്ബോള് ഒരു സ്വാഭാവിക പ്രതികരണമെന്ന നിലയില് ശരീരം കോർട്ടിസോള് ഹോർമോണ് പുറത്തുവിടുന്നു. ഉയർന്ന കോർട്ടിസോളിൻ്റെ അളവ് കലോറി കൂടുതലുള്ള ഭക്ഷണങ്ങളോടുള്ള വിശപ്പും ആസക്തിയും വർധിപ്പിക്കുമെന്ന് പഠനങ്ങള് നേരത്തെ തെളിയിച്ചിട്ടുള്ളതാണ്.
അടിവയറ്റില് കൊഴുപ്പ് അടിയുന്നത് ഹൃദ്രോഗത്തിനും പ്രമേഹത്തിനുമുള്ള സാധ്യത വർധിപ്പിക്കും. സമ്മർദ്ദം വർധിക്കുന്ന സാഹചര്യത്തില് വ്യായാമം ചെയ്യുന്നതോ ഭക്ഷണം ക്രമീകരിക്കുന്നതോ ഫലപ്രദമാകില്ലെന്ന് വിദഗ്ധർ ചൂണ്ടികാണിക്കുന്നു. കരളിനെയും കുടലിനെയും തുടങ്ങി മറ്റ് അടിവയറ്റിലെ അവയവങ്ങളെ ചുറ്റിപ്പറ്റിയിരിക്കുന്നതാണ് അടിവയറ്റിലെ കൊഴുപ്പ്. പേശികള്ക്ക് താഴെയുള്ള കോശങ്ങളുടെ പാളിയായ ഓമെന്റത്തിലാണ് ഈ കൊഴുപ്പ് സംഭരിക്കുന്നത്.
കൊഴുപ്പ് വർധിക്കുന്നതിനൊപ്പം ആ കോശങ്ങള് കഠിനമാകുകയും അരക്കെട്ടിന് വലിപ്പം വെക്കുകയും ചെയ്യുന്നു. അടിവയറ്റിലെ കൊഴുപ്പ് സാധാരണയുള്ളതിനെക്കാള് അപകടകരമാണ്. ഇത് സൈറ്റോകൈനുകള് എന്ന് അറിയപ്പെടുന്ന പ്രോട്ടീനെ പുറപ്പെടുവിക്കുന്നു. ഈ പ്രോട്ടീനുകള് ഹൃദ്രോഗം, പ്രമേഹം തുടങ്ങിയ വിട്ടുമാറാത്ത ആരോഗ്യപ്രശ്നങ്ങള്ക്കുള്ള സാധ്യത വർധിപ്പിക്കുകയും ചെയ്യും.
മാനസിക സമ്മർദ്ദം കുറക്കാൻ ശ്രദ്ധിക്കേണ്ട കാര്യങ്ങൾ
ഇഷ്ടപ്പെട്ട പ്രവർത്തനത്തിൽ ഏർപ്പെടാം
ചെയ്യാൻ ഇഷ്ടപ്പെടുന്ന കാര്യങ്ങൾ പല ആളുകൾക്കും വ്യത്യസ്തമാണ്. നിങ്ങളെ സന്തോഷിപ്പിക്കുന്ന കാര്യമെന്താണോ അത് ചെയ്യാൻ താല്പര്യം കാണിക്കുക. ഒരു ത്രില്ലർ നോവൽ വായിച്ചുകൊണ്ട് മനസ്സിനെ ഒന്ന് ഉഷാറാക്കാം. അല്ലെങ്കിൽ ഒരു കോമഡി ഷോയോ സിനിമയോ കണ്ടുകൊണ്ട് നിങ്ങളുടെ മുഖത്തെ ആ സന്തോഷകരമായ ചിരി തിരികെ കൊണ്ടുവരാം! മനോഹരമായ സംഗീതം കേൾക്കുക, സ്കെച്ചിംഗ് അല്ലെങ്കിൽ ക്രാഫ്റ്റിംഗ് പോലുള്ള സർഗാത്മക ശേഷി ഉൾക്കൊള്ളുന്ന നിങ്ങൾ ഇഷ്ടപ്പെടുന്ന എന്തെങ്കിലും ചെയ്യുക എന്നിവയും നിങ്ങളുടെ സമ്മർദ്ദം വലിയ തോതിൽ കുറയ്ക്കുവാൻ സഹായിക്കുന്നതാണ്.
യാത്ര പോകാം
വീട്ടിലെ സ്ഥിരം കാഴ്ചകളിൽ നിന്ന് ഒരു മാറ്റത്തിനായി നിങ്ങൾക്ക് പ്രകൃതിഭംഗി ആസ്വദിക്കുവാനായി പുറത്ത് നടക്കാൻ പോകാം, അല്ലെങ്കിൽ ജോഗിങിനായി പോകാം! ധ്യാനം ചെയ്യുന്നത് നിങ്ങളെ ശാന്തമാക്കുമെങ്കിലും, വ്യായാമം ചെയ്യുന്നത് മാനസിനില മെച്ചപ്പെടുത്തുവാൻ സഹായിക്കുന്ന രാസവസ്തുക്കളായ എൻഡോർഫിനുകളെ പുറത്തുവിടുവാൻ സഹായിക്കുന്നു. വ്യായാമം ചെയ്യുന്നവരാണെങ്കിൽ വീട്ടിൽ നിന്നും പുറത്തിറങ്ങി ചെയ്യാൻ ശ്രമിക്കാം
വളർത്തുമൃഗത്തിനൊപ്പം കളിക്കാം
നിങ്ങളുടെ വളർത്തുമൃഗങ്ങളുമായി ഇടപഴകുന്നത് സമ്മർദ്ദ ഹോർമോൺ ആയ കോർട്ടിസോളിന്റെ അളവ് കുറയ്ക്കുമെന്ന് പഠനങ്ങൾ വ്യക്തമാക്കുന്നു. നായ്ക്കളെയോ പൂച്ചകളെയോ പോലുള്ള വളർത്തുമൃഗങ്ങളുമായി കളിക്കുന്നത് മാനസിനില മെച്ചപ്പെടുത്തുവാനും ഏകാന്തതയുടെ ചിന്തകൾ അകറ്റുവാനും സഹായിക്കുന്നു. നിങ്ങൾക്ക് ഒരു വളർത്തുമൃഗമില്ലെങ്കിൽ, നിങ്ങളുടെ പ്രദേശത്ത് അലഞ്ഞുതിരിയുന്ന ആരോരുമില്ലാത്ത മൃഗങ്ങൾക്ക് ഭക്ഷണം നൽകാൻ ശ്രമിക്കുക. ഇതിലൂടെ നിങ്ങളുടെ സമ്മർദ്ദം അലിഞ്ഞില്ലാതാവുമെന്ന് ഞങ്ങൾ ഉറപ്പുപറയുന്നു!
ഇത് കൂടാതെ പതിവായുള്ള വീട്ടുജോലികൾ ചെയ്യുന്നത് കൂടുതൽ ആവേശകരമാക്കാം. ഉദാഹരണത്തിന്, വീട്ടിലെ ജോലി ചെയ്യുമ്പോൾ പശ്ചാത്തലത്തിൽ നിങ്ങൾക്ക് ഇഷ്ടമുള്ള ഒരു പാട്ട് കൂടെ ആയാലോ? അത് കൂടാതെ വിശ്രമ വേളകളിൽ നിങ്ങൾക്ക് ഇഷ്ടമുള്ള സംഗീതം കേൾക്കുകയുമാകാം.
ശ്രദ്ധിക്കുക : അറിവിനെ ജനകീയമാക്കുക എന്ന ലക്ഷ്യം മാത്രമാണ് ഈ പോസ്റ്റിന് ഉള്ളത്.രോഗനിർണ്ണയത്തിനും ചികിത്സയ്ക്കും പകരമാകാൻ ഉദ്ദേശിച്ചുള്ളതല്ല, കൃതഹസ്തരായ ചികിത്സകരുടെ ഉപദേശപ്രകാരം മാത്രം ഔഷധങ്ങൾ ഉപയോഗിക്കുക. കൂടുതൽ പഠനം നടത്തി നല്ലത് മാത്രം സ്വീകരിക്കുക.ആരോഗ്യവിദഗ്ധന്റെയോ ന്യൂട്രീഷനിസ്റ്റിന്റെയോ ഉപദേശം തേടിയശേഷം മാത്രം ആഹാരക്രമത്തില് മാറ്റം വരുത്തുക.