രാജസ്ഥാനില്‍ നിന്ന് തട്ടിക്കൊണ്ടുപോയി ഹിമാചല്‍ പ്രദേശില്‍ ബന്ദിയാക്കപ്പെട്ട യുവാവിന് ജന്മദിനത്തില്‍ നാടകീയ മോചനം
രാജസ്ഥാനില്‍ നിന്ന് തട്ടിക്കൊണ്ടുപോയി ഹിമാചല്‍ പ്രദേശില്‍ ബന്ദിയാക്കപ്പെട്ട യുവാവിന് ജന്മദിനത്തില്‍ നാടകീയ മോചനം.
ജയ്പൂർ പൊലീസാണ് യുവാവിനെ കണ്ടെത്തി രക്ഷിച്ചത്. "അനൂജ്, എഴുന്നേല്‍ക്കൂ മകനേ, ജയ്പൂർ പോലീസാണ്. സമാധാനമായിരിക്ക്, ഞങ്ങളിവിടെയുണ്ട്" എന്ന വാക്കുകള്‍ കേട്ട് ഉറക്കത്തില്‍ നിന്ന് എഴുന്നേല്‍ക്കുന്ന യുവാവിന്‍റെ വീഡിയോ പൊലീസ് ചിത്രീകരിച്ചു.
ആഗസ്റ്റ് 18ന് സുഹൃത്തിനൊപ്പം ജയ്പൂരിലെ നഹർഗഡ് ഹില്ലിലേക്ക് പോയപ്പോഴാണ് അനൂജിനെ ഒരു സംഘം തട്ടിക്കൊണ്ടുപോയതെന്ന് പോലീസ് കമ്മീഷണർ ബിജു ജോർജ്ജ് ജോസഫ് പറഞ്ഞു. അനൂജിനെ സംഘം വായ പൊത്തി കൈകാലുകള്‍ കെട്ടി ബലമായി വാഹനത്തില്‍ കയറ്റി. അനൂജിന്‍റെ സുഹൃത്തിനെ മർദിച്ച ശേഷം റോഡരികില്‍ ഉപേക്ഷിക്കുകയും ചെയ്തു. വിവരമറിഞ്ഞ് ജയ്പൂരിലെ ബ്രഹ്മപുരി പോലീസ് സ്ഥലത്തെത്തി. ഡ്രോണ്‍ ഉപയോഗിച്ച് തിരച്ചില്‍ നടത്തിയെങ്കിലും അനൂജിനെ കണ്ടെത്താനായില്ല. തുടർന്ന് പല സംഘങ്ങളായി പൊലീസ് അന്വേഷണം തുടങ്ങി.
അതിനിടെ തട്ടിക്കൊണ്ടുപോയവർ 20 ലക്ഷം രൂപ മോചനദ്രവ്യം ആവശ്യപ്പെട്ട് അനൂജിന്‍റെ കുടുംബവുമായി ബന്ധപ്പെട്ടു. ഇത്രയും ഭീമമായ തുക കയ്യില്‍ ഇല്ലാതിരുന്നതിനാല്‍ വീട്ടുകാർ കുറച്ചു സമയം ആവശ്യപ്പെട്ടു. അതിനിടെ പോലീസ്, തട്ടിക്കൊണ്ടുപോയവർ വിളിച്ച ഫോണ്‍ നമ്ബർ കേന്ദ്രീകരിച്ച്‌ തിരച്ചില്‍ നടത്തി. പിടിക്കപ്പെടാതിരിക്കാൻ ഇവർ സ്ഥലം മാറിക്കൊണ്ടിരുന്നു. ഒടുവില്‍, കല്‍ക്ക - ഷിംല എക്സ്പ്രസ് ട്രെയിനിന്‍റെ അവസാന ബോഗിയില്‍ പണം എത്തിക്കാൻ അവർ കുടുംബത്തിന് നിർദ്ദേശം നല്‍കി. തുടർന്ന് ഇവരെ പിടികൂടാൻ വൻ പൊലീസ് സംഘത്തെ വിന്യസിച്ചു.
അതിനിടെ ധരംപൂർ റെയില്‍വേ സ്റ്റേഷന് സമീപം പണമടങ്ങിയ ബാഗ് വെയ്ക്കാൻ തട്ടിക്കൊണ്ടുപോയവർ അനൂജിന്‍റെ കുടുംബത്തോട് ആവശ്യപ്പെട്ടു. സ്ഥലത്തു നിന്നും ഒരാളെ പൊലീസ് അറസ്റ്റ് ചെയ്തു. ഇയാളെ ചോദ്യം ചെയ്തതോടെയാണ് കൂട്ടുപ്രതികള്‍ പിടിയിലായത്. തുടർന്ന് പോലീസ് അനൂജിനെ പൂട്ടിയിട്ട ഹിമാചല്‍ പ്രദേശിലെ ഹോട്ടല്‍ മുറി കണ്ടെത്തി. തട്ടിക്കൊണ്ടുപോയവരില്‍ ഒരാള്‍ അനൂജിനൊപ്പം ഈ മുറിയില്‍ ഉണ്ടായിരുന്നു. ഇവിടെ നിന്ന് നാല് പുരുഷന്മാരെയും ഒരു സ്ത്രീയെയും അറസ്റ്റ് ചെയ്തു. വീരേന്ദ്ര സിംഗ്, വിനോദ്, അമിത് കുമാർ, ജിതേന്ദ്ര ഭണ്ഡാരി, ജമുന സർക്കാർ എന്നിവരാണ് അറസ്റ്റിലായത്.
സോഫ്റ്റ്‌വെയർ എഞ്ചിനീയറായ വീരേന്ദ്ര സിംഗ് ആണ് തട്ടിക്കൊണ്ടുപോകലിന്‍റെ സൂത്രധാരൻ എന്ന് പൊലീസ് പറഞ്ഞു. ബിസിനസ്സില്‍ നഷ്ടമുണ്ടായതോടെയാണ് സുഹൃത്തുക്കളായ അമിത് കുമാറിനെയും വിനോദ് സിംഗിനെയും ജമുന സർക്കാരിനെയും മറ്റുള്ളവരെയും ഉള്‍പ്പെടുത്തി അനൂജിനെ തട്ടിക്കൊണ്ടുപോയി തടഞ്ഞു വെച്ചത്.