ഇപ്പോൾ സമൂഹമാധ്യങ്ങളിലൂടെ ജനശ്രദ്ധ പിടിച്ചുപ്പറ്റുന്ന ചില വാര്‍ത്തകള്‍ ചിരിപ്പിച്ചും ചിന്തിപ്പിച്ചും കടന്നുപോകുമ്ബോള്‍ മറ്റുചിലവ ഹൃദയത്തെ വല്ലാതെ സ്പർശിക്കുന്നതായിരിക്കും.
അത്തരം ഒരു വാർത്തയാണ് ഇപ്പോള്‍ സോഷ്യല്‍ മീഡിയ ഉപഭോക്താക്കളെ കണ്ണീരിലാഴ്ത്തിയിരിക്കുന്നത്. സ്വന്തം ഭർതൃ മാതാവിന്റെ സഹോദരിക്ക് കരള്‍ പകുത്തു നല്‍കിയ ഒരു മരുമകള്‍ ഒടുവില്‍ മരണത്തിന് കീഴടങ്ങിയ വാർത്തയാണിത്.
അർച്ചന എന്നു പേരുള്ള യുവതിയാണ് രോഗിയായ അമ്മായിയമ്മയുടെ സഹോദരിക്ക് തന്റെ കരളിന്റെ 60 ശതമാനത്തോളവും ശാസ്ത്രക്രിയയിലൂടെ ദാനം നല്‍കിയത്. സർജറി വിജയകരമായി പൂർത്തീകരിച്ചെങ്കിലും ദിവസങ്ങള്‍ക്കുശേഷം അർച്ചനയുടെ നില മോശമാകുകയും മരണത്തിന് കീഴടങ്ങുകയുമായിരുന്നു. നിരവധി ആളുകള്‍ കുടുംബത്തിന്റെ ദുഖത്തോടൊപ്പം പങ്കുചേർന്നു.
@Ghar Ke Kalesh എന്ന എക്സ് ഉപഭോക്താവാണ് ഇതുമായി ബന്ധപ്പെട്ട ഒരു വൈറല്‍ വീഡിയോയും അതില്‍ നിന്നുള്ള ഒരു വൈകാരിക കഥയും പങ്കുവെച്ചിരിക്കുന്നത്.
ഭർത്താവ് സി.എ. ചേതൻ കുമാറിന്റെ ബന്ധുവിന്റെ കരള്‍ മാറ്റിവെക്കല്‍ ശസ്ത്രക്രിയക്ക് ചേരുന്ന രക്ത ഗ്രൂപ് കരള്‍ ലഭ്യമല്ലാത്തതിനാല്‍ അർച്ചനയുടെ കരള്‍ ഭാഗം നല്‍കുകയായിരുന്നു. കുറച്ചു ദിവസം മുമ്ബാണ് ബംഗളൂരുവിലെ സ്വകാര്യ ആശുപത്രിയില്‍ ശസ്ത്രക്രിയകള്‍ നടന്നത്. കരള്‍ സ്വീകരിച്ചയാള്‍ സുഖമായിരിക്കുന്നു.
അർച്ചനയും സാധാരണ ജീവിതം നയിച്ചുവരുന്നതിനിടെ പെട്ടെന്ന് അവശയാവുകയായിരുന്നു. മംഗളൂരുവിലെ സ്വകാര്യ ആശുപത്രിയില്‍ പ്രവേശിപ്പിച്ചെങ്കിലും മരിച്ചു.
വീഡിയോയില്‍ തങ്ങളുടെ കുടുംബത്തോടൊപ്പമുള്ള അർച്ചനയുടെ യാത്രയെ കുറിച്ചാണ് വിവരിച്ചിരിക്കുന്നത്. അതിങ്ങനെ ആയിരുന്നു "ഒമ്ബത് വർഷം മുമ്ബ് എന്റെ സഹോദരൻ വിവാഹിതനായി, അങ്ങനെ അർച്ചന ഭാഭി ഞങ്ങളുടെ ജീവിതത്തിലേക്ക് കടന്നവന്നു, അവള്‍ ഞങ്ങളുടെ വീട്ടിലേക്ക് സന്തോഷം കൊണ്ടുവന്നു. അവള്‍ ഒരു മകനെ പ്രസവിച്ചു, ഈ വർഷം അവന്റെ നാലാമത്തെ ജന്മദിനമാണ്.
ഒരു ദിവസം അർച്ചനയുമായി വളരെ അടുപ്പം പുലർത്തിയിരുന്ന 65 വയസ്സുള്ള ഞങ്ങളുടെ അമ്മയുടെ സഹോദരിക്ക് രോഗം മൂർച്ഛിക്കുകയും അവരുടെ നില വഷളാകുകയും ചെയ്തു. എന്നാല്‍ ഒരു കരള്‍ മാറ്റിവെക്കല്‍ ശസ്ത്രക്രിയയിലൂടെ അവർക്ക് ഈ നില തരണം ചെയ്യാൻ കഴിയുമെന്ന് ഡോക്ടർമാർ പറഞ്ഞു. അപകടസാധ്യതകളെക്കുറിച്ച്‌ ഡോക്ടർമാർ മുന്നറിയിപ്പ് നല്‍കിയിരുന്നുവെങ്കിലും അർച്ചന അവര്‍ക്ക് തന്റെ കരള്‍ ദാനം ചെയ്യാൻ തീരുമാനിക്കുകയായിരുന്നു.
പതിനഞ്ച് ദിവസം മുമ്ബാണ് അവള്‍ തന്റെ കരളിന്റെ ഗണ്യമായ ഒരു ഭാഗം അമ്മായിയമ്മയുടെ സഹോദരിക്ക് ദാനം ചെയ്തുകൊണ്ട് ശസ്ത്രക്രിയയ്ക്ക് വിധേയയായത്. ഓപ്പറേഷൻ കഴിഞ്ഞ് ഒരു ദിവസത്തിനുശേഷം അർച്ചനയെ ഡിസ്ചാർജ് ചെയ്തെങ്കിലും അവളുടെ ആരോഗ്യം മോശമാകാൻ തുടങ്ങി. അവള്‍ക്ക് അണുബാധയുണ്ടായി. മൂന്ന് ദിവസത്തിനുള്ളില്‍ ഒന്നിലധികം അവയവങ്ങള്‍ തകരാരിലാകുകയും ഹൃദയഘാതത്തെ തുടർന്ന് അവള്‍ മരണപ്പെടുകയും ചെയ്തു.