ഓരോരുത്തരും അവനവന്റെ ശരികൾക്കനുസരിച്ചാണ്‌ തീരുമാനങ്ങൾ എടുക്കുന്നതും നടപ്പാക്കുന്നതും.. ആ ശരികൾ രൂപപ്പെടുന്നത്‌ നമ്മുടെ പരിമിതമായ അനുഭവങ്ങളിൽ നിന്നും കാഴ്ച്ചപ്പാടുകളിൽ നിന്നും ആണ്. പിന്നീട് മുന്നോട്ടുള്ള പോക്കിൽ അവ തെറ്റാണെന്ന് തിരിച്ചറിയപ്പെടാം . അപ്പോൾ അവ തുടങ്ങിയ ഇടത്ത്‌ തന്നെ അവസാനിപ്പിക്കാൻ ആകണം . അതിന്‌ കഴിഞ്ഞില്ലെങ്കിൽ തെറ്റ് തിരിച്ചറിയുന്നിടത്ത്‌ നിർത്തണം.
ഏതാണ് തെറ്റ്? ഏതാണ് ശരി? ഒരു കൂട്ടരുടെ തെറ്റ് മറ്റൊരുകൂട്ടര്‍ക്കു ശരി. ഒരു കാലത്തെ ശരി മറ്റൊരുകാലത്ത് തെറ്റ് – തെറ്റും ശരിയും ഇങ്ങനെ മാറിമാറി വരുമ്പോള്‍ തെറ്റേത് ശരിയേത് എന്ന് എങ്ങനെ വേര്‍തിരിക്കാന്‍ കഴിയും.
മനുഷ്യനെ മനുഷ്യന് കൊല്ലുന്നത് ലോകം അംഗീകരിക്കുന്ന മഹത്തായതെറ്റ്. എന്നാല്‍ യുദ്ധക്കളത്തിലെ കൊലയോ…?ലോകം അംഗീകരിക്കുന്ന ഏറ്റവും വലിയ ശരിയായി മാറുന്നു. ദയാവധം ചില രാജ്യങ്ങള്‍ ശരിയായി അംഗീകരിക്കുമ്പോള്‍ മറ്റ് ചില രാജ്യങ്ങള്‍ അവയെ തെറ്റായിക്കാണുന്നു. ഗോഹത്യ മഹാപാപം എന്നു വിധിക്കുമ്പോള്‍ ജന്തുഹത്യ മുഴുവന്‍ പാപമല്ലേയെന്നു മറ്റുചിലര്‍. ജീവന്റെ വില സമസ്ത ജീവികള്‍ക്കും തുല്യമായിരിക്കെ എറുമ്പിനെ കൊല്ലുന്നവനു ശിക്ഷയില്ല ആനയെ വെടിവെച്ചുക്കൊല്ലാം. അപ്പോള്‍ അത് തെറ്റാകുന്നില്ല. ഒരു രാജ്യത്ത് ദു:ഖം പ്രകടിപ്പിക്കുന്നതിന് കറുത്ത വസ്ത്രം ധരിക്കുന്നതാണ് ശരിയെങ്കില്‍ മറ്റൊരു രാജ്യത്ത് വെളുത്ത വസ്ത്രം ധരിക്കുന്നതാണ് ശരി. നേരെവിടെ – നെറിയെവിടെ? ആയിരം കുറ്റവാളി രക്ഷപ്പെട്ടാലും ഒരു നിരപരാധി ശിക്ഷിക്കപ്പെടാന്‍ പാടില്ലത്രെ. ശക്തമായ നീതിപീഠത്തിന്റെ ശരി. തെളിവുകളുടെ അടിസ്ഥാനത്തില്‍ മാത്രം മരണശിക്ഷവിധിക്കപ്പെട്ടവരില്‍ എത്രയോ നിരപരാധികളുണ്ടായിരുന്നുവെന്ന് പിന്നീട് തെളിയിക്കപ്പെട്ടു. നഷ്ടപ്പെട്ട അവരുടെ ജീവിതവും, അതിന്റെ പിന്നില്‍ അനുഭവിക്കപ്പെട്ടവരുടെ കറുത്ത ദു:ഖങ്ങളും പരിഹരിക്കാവുന്നതാണോ…? നീതിപീഠത്തിന്റെ തെറ്റ് എങ്ങിനെ ശരിയാകും?
ഒരു കാലത്തെ തെറ്റ് മറ്റൊരുകാലത്ത് ശരിയാകുന്നു. പണ്ട് കാലത്ത് വളര്‍ത്തു മൃഗങ്ങളെയും പക്ഷികളെയും ദൈവത്തിനു മുന്നില്‍ കുരുതി കൊടുക്കുമായിരുന്നു. ഇന്നത് നിരോധിക്കപ്പെട്ടിരിക്കുന്നു. ഭര്‍ത്താവു മരിച്ചാല്‍ അടക്കുന്ന ചിതയില്‍ ഭാര്യയും ചാടി മരിക്കമെന്നത് ഒരു കൂട്ടരുടെ ധര്‍മ്മപരമായ ശരിയായിരുന്നു. അത് പിന്നീട് തെറ്റാണന്നു കണ്ടെത്തി നിരോധിച്ചു. ജനകീയ -ജനാധിപത്യ ഭരണത്തിലും, ഭരണകക്ഷി പ്രതിപക്ഷമാകുമ്പോഴും, പ്രതിപക്ഷം ഭരണ കക്ഷിയാകുമ്പോഴും ഇങ്ങനെ തെറ്റും ശരിയും മാറിമാറി ആവര്‍ത്തിക്കുന്നു. ഈ തെറ്റും ശരികളും ആരാണുണ്ടാക്കിയത് നാം മനുഷ്യര്‍ തന്നെ. ഇനി പറയൂ…. എവിടെയാണ് തെറ്റ്? എവിടെയാണ് ശരി?
നാം ശരി എന്ന് കരുതി മുന്നോട്ട്‌ പോകുന്ന പല കാര്യങ്ങളിലും പിന്നീട് അത് തെറ്റായ വഴി അല്ലെങ്കിൽ മാർഗം ആയിരുന്നു എന്ന് മനസ്സിലാക്കുമ്പോൾ തിരിച്ചു നടക്കുന്നതിൽ അമാന്തം അരുത്‌.. തിരിച്ചു വരുന്നതിനുള്ള മടിയാണ്‌ തന്നിഷ്ടപ്രകാരമുള്ള പല യാത്രകളുടെ ദുർവിധി തീരുമാനിക്കുന്നത്‌.
ഓരോരുത്തരും അവനവന്റെ ശരികൾക്കനുസരിച്ചാണ്‌ തീരുമാനങ്ങൾ എടുക്കുന്നതും നടപ്പാക്കുന്നതും.. ആ ശരികൾ രൂപപ്പെടുന്നത്‌ നമ്മുടെ പരിമിതമായ അനുഭവങ്ങളിൽ നിന്നും കാഴ്ച്ചപ്പാടുകളിൽ നിന്നും ആണ്. പിന്നീട് മുന്നോട്ടുള്ള പോക്കിൽ അവ തെറ്റാണെന്ന് തിരിച്ചറിയപ്പെടാം . അപ്പോൾ അവ തുടങ്ങിയ ഇടത്ത്‌ തന്നെ അവസാനിപ്പിക്കാൻ ആകണം . അതിന്‌ കഴിഞ്ഞില്ലെങ്കിൽ തെറ്റ് തിരിച്ചറിയുന്നിടത്ത്‌ നിർത്തണം .
ഒരാളുടെ യഥാർത്ഥ അതിജീവനശേഷി അളക്കേണ്ടത്‌ അയാളുടെ മടങ്ങി വരവിനുള്ള കഴിവിനെ അടിസ്ഥാനമാക്കിയാണ്‌. . തെറ്റാണ്‌ എന്ന് അറിഞ്ഞിട്ടും വീണ്ടും തുടരുന്ന യാത്രകൾ കൂടുതൽ അപകടകരമാണ്‌.
മുന്നിൽ അഗാധ ഗർത്തം ആണെന്ന് അറിഞ്ഞിട്ടും പിൻവാങ്ങുന്നില്ലെങ്കിൽ ആർക്കും നമ്മെ പിന്നെ രക്ഷപ്പെടുത്താനായി എന്ന് വരില്ല.