മരണം പരിഹാരമായി കാണുന്നവന്‍ യഥാര്‍ത്ഥത്തില്‍ പുതിയ ഊരാക്കുടുക്കുകള്‍ക്ക് തുടക്കമിടുകയാണ്.
ഈ ലോകത്ത്‌ ഏറ്റവും മൂല്യം ഉള്ളത് നാം ഓരോരുത്തരുടെയും ജീവനു തന്നെയാണ്‌... ജീവിതത്തിന്റെ മൂല്യം അളക്കാൻ വേറെ എത്ര സമ്പത്ത്‌ കൊണ്ടും നമുക്ക് ആവില്ല... ലോകത്തെ ഏറ്റവും വലിയ കോടീശ്വരൻ പോലും മരണത്തെ അതിജീവിക്കാൻ അവരുടെ കയ്യിലെ മുഴുവൻ സമ്പത്തും നൽകാൻ തയ്യാറാകും എന്നതാണ് സത്യം...
ഒരു സംഭവകഥയുണ്ട്‌..., ഒരു ആഡംബരകപ്പല്‍ ലണ്ടനില്‍ നിന്ന് ന്യൂയോര്‍ക്കിലേക്ക് യാത്രയായി. പുറംകടലിലെത്തിയപ്പോള്‍ ദൗര്‍ഭാഗ്യം കൊടുങ്കാറ്റിന്റെ രൂപത്തിലെത്തി. കപ്പല്‍ അപകടത്തില്‍പ്പെട്ടു. എല്ലാവര്‍ക്കും രക്ഷപ്പെടാനുള്ള ലൈഫ് ബോട്ട് ഇല്ലെന്ന വിവരം അപ്പോഴാണറിഞ്ഞത്. ജനം തിക്കും തിരക്കുമായി. കൈയ്യൂക്കുള്ളവര്‍ രക്ഷാ ബോട്ടില്‍ കയറിപ്പറ്റി. വൃദ്ധനായ ഒരു കോടീശ്വരന് അക്കൂട്ടത്തില്‍ കയറിക്കൂടാനായില്ല. കോട്ടിന്റെ ഉള്ളില്‍ നിന്നും ബ്ലാങ്ക് ചെക്ക് എടുത്തുയര്‍ത്തി കോടീശ്വരന് കേണു. “ഇതാ.. എന്റെ ബ്ലാങ്ക് ചെക്ക്. കോടികള്‍ എന്റെ പേരില്‍ ബാങ്കിലുണ്ട്. ആരെങ്കിലും ഒരു സീറ്റ് എനിക്കു തരൂ.”
ഉടന്‍ രക്ഷാബോട്ടില്‍ നിന്നും ഒരാള്‍ ആക്രോശിച്ചു, “തങ്ങള്‍ക്കെന്താ ഭ്രാന്തുണ്ടോ. ഈ ലോകത്തിലെ സ്വര്‍ണ്ണഖനികള്‍ മുഴുവന്‍ തന്നാലും അതിനു പകരം ജീവന്‍ നല്‍കാന്‍ നിങ്ങൾക്ക് സാധിക്കുമോ?”
ജീവിതമാണ് ഏറ്റവും വലുത് അല്ലെങ്കിൽ പ്രിയപ്പെട്ടത് എന്ന കാര്യത്തില്‍ ആര്‍ക്കും സംശയമേയില്ല. എന്നിട്ടും ഈ വിലയേറിയ ജീവിതം ഒരു വിലയുമില്ലാത്ത രീതിയില്‍ നാം കൈകാര്യം ചെയ്യുന്നത് തെറ്റല്ലേ. ആദ്യം ജീവിതത്തിന്റെ വില മനസ്സിലാക്കി നമ്മുടേയും മറ്റുള്ളവരുടേയും ജീവിതം ധന്യമാക്കാന്‍ യത്നിക്കുക. വിലയേറിയ ജീവിതം വിലയുള്ളതാക്കാന്‍ അത് നന്നായി കൈകാര്യം ചെയ്യണം. അതിനുള്ള വഴികളാണ് മഹത്തുക്കള്‍ കാണിച്ചു തന്നിട്ടുള്ളത്.
ചിലർ ജീവനു വേണ്ടി കയ്യിലെ സമ്പത്ത്‌ മുഴുവൻ നൽകാൻ തയ്യാറാവുമ്പോൾ മറ്റു ചിലർ വളരെ നിസ്സാരമായ ചില കാര്യങ്ങളുടെ പേരിൽ ജീവൻ ഒടുക്കാറുമുണ്ട്‌...ജീവിതത്തിന്റെ ശരിയായ മൂല്യമൊ അർത്ഥമോ മനസ്സിലാക്കാത്ത ചില ദുർബല മനസ്ഥിതിക്കാരാണ്‌ സ്വയം ഹത്യ ചെയ്യാൻ തയ്യാറാവുന്നത്‌.
മരണം പരിഹാരമായി കാണുന്നവന്‍ യഥാര്‍ത്ഥത്തില്‍ പുതിയ ഊരാക്കുടുക്കുകള്‍ക്ക് തുടക്കമിടുകയാണ്. മരണം സ്വഭാവികമാവണം.. അത് പരിഹാരമല്ല അകാലത്തില്‍ മരണം വരിക്കുന്നവന്‍ അവനു തന്നെയും ജീവിച്ചിരിക്കുന്നവര്‍ക്കും കൂടി പ്രശ്നങ്ങളുടെ വിത്തിടുകയാണ്. മരണം ജീവന്റെ അവസാന താവളമല്ല.