നിങ്ങളൊരു മാലാഖയാണ് . ചിറകുകൾ ജന്മനാ ഉള്ളവർ .നിങ്ങൾക്കെന്തിനാണ് ഒരുപാടുപേരുടെ പൊള്ളയായ കൂട്ട് ?നിങ്ങൾക്കെന്തിനാണ് കുറെയേറെ വെറും വാക്കുകൾ ? എന്തിനാണ് അന്തമില്ലാത്ത സങ്കടങ്ങൾ ?ഒന്നോർത്താൽ ഒറ്റക്കാകുന്നത് രസമല്ലേ ? നമ്മളെ ഏറ്റവും നന്നായി മനസിലാകുന്ന നമ്മളോട് തന്നെ മിണ്ടിയിരിക്കാൻ എന്ത് രസമാണ് ! നമ്മുടെ ഇഷ്ടങ്ങൾ മറ്റാരേക്കാളും നന്നായി മനസിലാക്കുന്ന നമ്മളോടൊപ്പം ഇഷ്ടമുള്ള എന്തും ചെയ്യാവുന്ന സ്വാതന്ത്ര്യത്തിന്റെ ചിറകുകളാണ് ശരിക്കും ഒറ്റപ്പെടൽ.
നിറഞ്ഞ ജനമുള്ള ഒരു തെരുവില്‍ കൂടി നിങ്ങള്‍ നടക്കുകയാണ് എന്ന് വിചാരിക്കുക. തികച്ചും അപരിചിതരായ ആളുകള്‍. ആരും നിങ്ങളെ തിരിച്ചറിയുന്നില്ല. ആരും നിങ്ങളോട് സംസാരിക്കുന്നില്ല. ആള്‍കൂട്ടത്തിന് നടുവില്‍ നിങ്ങള്‍ പുഴയില്‍ ഉപേക്ഷിക്കപ്പെട്ട ഒരു തോണിയാകുന്നു. നിങ്ങളുടെ അസ്ത്വിത്വം പോലും അവിടെ ചോദ്യചിഹ്നമാകുന്നു. ആദ്യമൊക്കെ നിങ്ങള്‍ നിങ്ങളോട് തന്നെ സംസാരിച്ചു കൊണ്ടിരിക്കും. ക്രമേണ ചിന്തകള്‍ ഭാരമില്ലാത്ത മേഘങ്ങള്‍ പോലെയായി പറന്നകലും.
അവസാനം ഒരു ശലഭത്തിന്റെ ചിറകടിപോലെ മൗനം നിശബ്ദമായി കടന്നുവരും. നിങ്ങള്‍ പോലുമറിയാതെ നിങ്ങള്‍ ധ്യാനത്തിലേക്ക് മെല്ലെ പ്രവേശിക്കും. ഇലത്തുമ്പില്‍ നിന്നും ഇറ്റുവീഴുന്ന ജലകണം മണ്ണിനെ സ്പര്‍ശിക്കുന്നതിന് മുന്‍പുള്ള സ്വാതന്ത്ര്യം നിങ്ങള്‍ അനുഭവിക്കും.
എത്രപേരുണ്ട് നമുക്ക് ചുറ്റും ..എന്നിട്ടും ഒറ്റക്കാണ് നാം .എണ്ണിയാലൊടുങ്ങാത്ത സൗഹൃദങ്ങൾ ,എണ്ണം പറഞ്ഞ ബന്ധങ്ങൾ ,എണ്ണത്തിനുമപ്പുറം സോഷ്യൽ മീഡിയ സുഹൃത്തുക്കൾ ,എണ്ണമൊപ്പിച്ച നാട്ടുകാർ ,എണ്ണം വിരൽപിടിയിലൊടുങ്ങുന്ന വീട്ടുകാർ ....ആരുണ്ടായിട്ടും നമ്മൾ ഒറ്റക്കാണ് ...
നമ്മൾ കേൾക്കാറുള്ള പരാതികളിൽ ഏറ്റവും കൂടുതൽ ഈ ഏകാന്തതയെക്കുറിച്ചാണെന്നു തോന്നുന്നു !
ഒറ്റപ്പെട്ടുപോകുന്നു..ഒറ്റക്കായി പോകുന്നു..ഒരുപാടുപേരുണ്ട് ചുറ്റും .പക്ഷേ ഞാൻ മിക്കപ്പോഴും ഒറ്റക്കായിപോകും.
പ്രിയപ്പെട്ടവരേ , ഏതാൾക്കൂട്ടത്തിലും ഒറ്റപ്പെടാൻ ഭാഗ്യം സിദ്ധിച്ചവരേ നിങ്ങളത്രെ അത്രമേൽ ഭാഗ്യവാന്മാർ..
നിങ്ങൾ എങ്ങിനെ ജനിച്ചു എന്നോർത്തിട്ടുണ്ടോ ?ഒറ്റക്ക് ..
ഇരട്ടകളാണെങ്കിൽ പോലും നിങ്ങൾ ജനിച്ച സമയം നിങ്ങൾ മാത്രമായിരുന്നു ആ നിമിഷത്തിലൂടെ കടന്നുവന്നത് ..പിച്ചവക്കാൻ പഠിക്കാൻ കൈകൾ ഒപ്പമുണ്ടായിരുന്നു പക്ഷേ ആദ്യ ചുവടുകൾ ഉറച്ചത് ,മുന്നോട്ട് നടന്നു തുടങ്ങിയത് നിങ്ങൾ ഒറ്റക്കാണ് !
പാഠങ്ങൾ അദ്ധ്യാപകൻ ഉച്ചത്തിൽ പറഞ്ഞതിനെ ഒപ്പം കേട്ടു കൂട്ടുകൂടാൻ ക്ലാസ്സിൽ ഒരുപാട് പേരുണ്ടായിരുന്നെങ്കിലും മനസിലാക്കിയത് നിങ്ങൾ ഒറ്റക്കാണ്.
പരീക്ഷയിലും ,അതിന്റെ ജയപരാജയങ്ങളിലും നിങ്ങൾ മാത്രമായിരുന്നു നിങ്ങൾക്ക് കൂട്ട്.
ജീവിത പരീക്ഷയുടെ നാളുകളിൽ ഇന്നോളം "ഞാനുണ്ട് ഒപ്പം "എന്നുപറഞ്ഞ ആരെങ്കിലും സ്ഥിരമായി നിങ്ങൾക്കൊപ്പം ഉണ്ടായിട്ടുണ്ടോ ?
സാദ്ധ്യത അങ്ങേയറ്റം കുറവാണ് .അഥവാ ഉണ്ടെങ്കിലും അങ്ങനൊരാൾ സ്ഥിരമായിരുന്നിട്ടുണ്ടാകും എന്ന് പ്രതീക്ഷിക്കുകയുമരുത് ; കാരണം നിങ്ങളുടെ ജീവിതം നേരിടേണ്ടത് നിങ്ങളൊറ്റക്കാണ് എന്നത് നിങ്ങൾക്ക് നന്നായി അറിയാം എന്നത് തന്നെ.
ഒറ്റക്കായി എന്ന് തോന്നുമ്പോൾ നിങ്ങൾ സ്വതന്ത്രരാണ് എന്ന് മനസിലാക്കുക .ഭാരമില്ലാതെ ,കെട്ടുപാടുകൾ ഇല്ലാതെ ചിറകു വച്ച് പറക്കുകയാണ് നിങ്ങൾ ..ഒരാൾക്കും നിങ്ങൾക്കൊപ്പം എത്താനാകില്ല തന്നെ ...അല്ലെങ്കിലും ,നിങ്ങളെ ,നിങ്ങളുടെ സ്വപ്നങ്ങളെ ,നിങ്ങളുടെ എത്രയോ മനോഹരമായ ഈ ചിരിയെ ,സുന്ദരമായ ജീവിതത്തെ നിങ്ങൾ ഒറ്റക്കല്ലാതെ എങ്ങിനെ ആഘോഷിക്കും എന്നാണ് കരുതുന്നത് ??
നിങ്ങളൊരു മാലാഖയാണ് . ചിറകുകൾ ജന്മനാ ഉള്ളവർ .നിങ്ങൾക്കെന്തിനാണ് ഒരുപാടുപേരുടെ പൊള്ളയായ കൂട്ട് ?നിങ്ങൾക്കെന്തിനാണ് കുറെയേറെ വെറും വാക്കുകൾ ? എന്തിനാണ് അന്തമില്ലാത്ത സങ്കടങ്ങൾ ?ഒന്നോർത്താൽ ഒറ്റക്കാകുന്നത് രസമല്ലേ ? നമ്മളെ ഏറ്റവും നന്നായി മനസിലാകുന്ന നമ്മളോട് തന്നെ മിണ്ടിയിരിക്കാൻ എന്ത് രസമാണ് !!
നമ്മുടെ ഇഷ്ടങ്ങൾ മറ്റാരേക്കാളും നന്നായി മനസിലാക്കുന്ന നമ്മളോടൊപ്പം ഇഷ്ടമുള്ള എന്തും ചെയ്യാവുന്ന സ്വാതന്ത്ര്യത്തിന്റെ ചിറകുകളാണ് ശരിക്കും ഒറ്റപ്പെടൽ .ജനനത്തിൽ വന്നപോലെ പോകുമ്പോളും ഒന്നും കൂടെ കൊണ്ടുപോകില്ലായെങ്കിൽ, മരണത്തിലും ആരെയും ഒപ്പം കൊണ്ടുപോകാനോ ,ആരെങ്കിലും ഒപ്പം കൂട്ടുവരാനോ സാധിക്കില്ലെന്നിരിക്കെ നിങ്ങളെന്തുകൊണ്ടാണ് "ഒറ്റപ്പെടൽ "എന്ന ഈ മഹനീയ അനുഗ്രഹത്തെ സങ്കടത്തോടെ കാണുന്നത് ?
കണ്ണുകൾ ഉയർത്തു . നിങ്ങൾ നിങ്ങളാണ് . മറ്റൊരാളുടെയും സപ്പോർട്ട് ആവശ്യമില്ലാത്ത ,മറ്റാർക്കും കഴിയാത്തത്ര നിങ്ങളെ മനസ്സിലാക്കിയിട്ടുള്ള ,നിങ്ങൾ ഏറ്റവും കൂടുതൽ വർത്തമാനം പറഞ്ഞിട്ടുള്ള ,നിങ്ങളുടെ രഹസ്യങ്ങളും ,സന്തോഷങ്ങളും ,സങ്കടങ്ങളും തുടങ്ങി അകം പുറം എല്ലാമെല്ലാം അറിയുന്ന നിങ്ങൾ നിങ്ങൾക്ക് കൂട്ടായി ഉള്ളതിനേക്കാൾ വലുതായി മറ്റാരാണ് ഭൂമിയിൽ ???
ചിറകുകൾ വിടരട്ടെ . ഉയരുക... ആകാശം വിളിക്കുന്നു.